Zbardhet vendimi i Gjykatës së Lartë për Sajmir Tahirin

Është zbardhur vendimi i Gjykatës së Lartë për ish-ministrin e Brendshëm, Sajmir Tahiri.Gjykata e Lartë argumenton se ka shkelje proceduriale gjatë gjykimit të Tahirit dhe Jaeld Çelës.

Sipas kësaj gjykate, gjyqtarja Albana Boksi ishte në konflikt interesi pasi ka shqyrtuar çështjen e Taulant Haxhirajt në një procedim të lidhur.

“Gjykata gaboi pasi nuk i dha mundësinë Tahirit të mbrohej për akuzën e shpërdorimit të detyrës, ndonëse sipas ligjit mund të bëjë rikualifikim ndryshe të veprës penale, por duke i dhënë mundësinë të pandehurit të paraqesë argumentat e tij”, lexohet në dokument.

Gjykata e Lartë vendosi të rikthejë edhe një herë për gjykim në Apel çështjen e ish-ministrit të Brendshëm, Saimir Tahiri. Gjykata e Lartë vendosi që këtë herë çështjen ta drejtojë një tjetër trupë gjykuese, duke miratuar kërkesën e avokatit të Tahirit, Maksim Haxhia.

Gjatë dëgjimit të pretendimit të palëve në seancë, SPAK kërkoi lënien në fuqi të vendimit të Apelit, që nga ana e tij kishte vendosur për kthim të çështjes në gjykim në Shkallë të Parë.

Rekurs për çështjen ka bërë edhe prokuroria, e cila i qëndron kërkesës për dënimin e Tahirit me 12 vite burg për “trafik narkotikësh” dhe “grup të strukturuar kriminal”. Sipas prokurorisë, Tahiri dhe i bashkëpandehuri i tij Jaeld Cela kanë garantuar grupin e “Habilajve” në trafikun e sasive të mëdha të kanabisit nga Shqipëria në Itali.

“Do të ndjekim procedurën dhe do të shkojmë sërish në Gjykatën e Apelit”, tha Tahiri pasi doli nga gjykata.