Presidenti i Turqisë, Recep Tayyip Erdogan, ka doli lideri më i pëlqyer në Kosovë, Maqedoninë e Veriut dhe Bosnjë dhe Hercegovinë në një sondazh të zhvilluar në vendet e Ballkanit, ndërsa është renditur i dyti në Mal të Zi dhe i katërti në Serbi ndër liderët ndaj të cilëve publiku ka pikëpamje më pozitive.
Hulumtimi me titull “Anketa rajonale e Ballkanit Perëndimor” është realizuar nga Instituti Ndërkombëtar Republikan në Kosovë, Maqedoninë e Veriut, Bosnjë e Hercegovinë, Serbi dhe Mal të Zi.
Në këtë anketë ballë për ballë me qytetarët, janë bërë pyetje si: “A mendoni se vendi juaj po ecën në drejtim të duhur apo të gabuar?”; “Cili është problemi më i madh me të cilin përballet vendi juaj sot?”; “Cili është problemi më i madh me të cilin përballet Evropa sot?”; “Çfarë lloj njerëzish kemi nevojë të na udhëheqin në të ardhmen?”; “Cilin vend e shihni si aleatin më të rëndësishëm për vendin tuaj?”; dhe “Çfarë mendimi keni për liderët botërorë dhe rajonalë të mëposhtëm – shumë negativ, disi negativ, disi pozitiv apo shumë pozitiv?”.
Pjesëmarrësit kanë theksuar se problemet kryesore me të cilat përballen vendet e tyre dhe me të cilat qeveritë duhet të merren janë “jeta e shtrenjtë, çmimet e larta, korrupsioni dhe papunësia”.
Në pyetjen “Çfarë mendimi keni për liderët botërorë dhe rajonalë të mëposhtëm?”, presidenti Erdoğan është renditur si lideri ndaj të cilit janë shprehur opinionet më pozitive në Kosovë, Maqedoninë e Veriut dhe Bosnjë e Hercegovinë.
Në Kosovë, presidenti Erdogan është renditur i pari me 77 për qind, presidenti amerikan Donald Trump i dyti me 74 për qind dhe pas tyre presidenti kinez Xi Jinping me 16 për qind.
Në Maqedoninë e Veriut, Erdogan ka kryesuar me 75 për qind, Trump i dyti me 66 për qind dhe presidenti rus Vladimir Putin i treti me 52 për qind.
Në Bosnjë e Hercegovinë, 62 për qind e të anketuarve kanë thënë se kanë mendim pozitiv për presidentin Erdogan, ndërsa Xi ka dalë i dyti me 50 për qind dhe Putin i treti me 42 për qind.
Në Mal të Zi, Xi ka dalë i pari me 57 për qind, ndërsa Erdogan dhe Putin kanë ndarë vendin e dytë me nga 54 për qind, të ndjekur nga Trump me 52 për qind.
Në Serbi, Putini ka dalë i pari me 79 për qind, Xi i dyti me 70 për qind, Trump i treti me 44 për qind, ndërsa Erdoğan ka marrë 38 për qind pikëpamje pozitive.
Në hulumtim kanë marrë pjesë 1164 persona nga Kosova, 1.221 nga Maqedonia e Veriut, 1.219 nga Bosnjë dhe Hercegovina, 1.020 nga Mali i Zi dhe 1.216 nga Serbia.
Shqip