Venezuela është goditur nga dy tërmete të fuqishme mbrëmjen e së mërkurës, me një diferencë prej më pak se një minute mes tyre, duke shkaktuar panik te banorët dhe dëme të konsiderueshme në disa zona të vendit.
Sipas të dhënave të raportuara, tërmeti i parë me magnitudë 7.2 ballë u regjistrua pranë San Felipe, në shtetin Yaracuy. Vetëm 39 sekonda më vonë, një lëkundje edhe më e fortë me magnitudë 7.5 ballë goditi të njëjtën zonë, sipas Shërbimit Gjeologjik të Shteteve të Bashkuara (USGS).
Autoritetet nuk kanë dhënë ende një bilanc zyrtar për viktimat apo shkallën e dëmeve, ndërsa ekipet e emergjencës vijojnë operacionet në terren.
USGS paralajmëron se pasojat mund të jenë të rënda. Sipas vlerësimeve paraprake, ekziston një probabilitet prej 44% që numri i viktimave të kalojë 10 mijë persona dhe një mundësi prej 30% që ai të tejkalojë 100 mijë pas tërmetit të dytë.
Lëkundjet janë ndjerë edhe në kryeqytetin Karakas, ku raportohen shembje ndërtesash, ndërprerje të furnizimit me karburant dhe persona të bllokuar nën rrënoja që kërkojnë ndihmë.
Ministri i Brendshëm u ka bërë thirrje qytetarëve të largohen nga banesat e tyre dhe të ndjekin udhëzimet e autoriteteve, për shkak të rrezikut nga lëkundje të tjera pasuese.
Ekipet e shpëtimit dhe shërbimet e emergjencës janë angazhuar në zonat më të prekura, ndërsa pritet një pasqyrë më e qartë e situatës në orët në vijim.
Shqip