Koalicioni VLEN ka reaguar ashpër ndaj incidentit të ndodhur në Tetovë, ku dy nxënës shqiptarë u sulmuan nga persona të lidhur me tifogrupin “Vojvodët”. Në një deklaratë publike, VLEN e cilësoi rastin si një përpjekje të rrezikshme për të ringjallur tensionet ndëretnike në prag të zgjedhjeve.
“Rastet e tilla janë kujtim i keq nga e kaluara që po ringjallen para zgjedhjeve dhe po keqpërdoren për të nxitur tensione ndëretnike,” thuhet në reagimin e tyre.
VLEN përshëndeti reagimin e shpejtë të Sektorit për Punë të Brendshme në Tetovë, që identifikoi dhe arrestoi disa nga të dyshuarit brenda një kohe të shkurtër.
“Sjellja e institucioneve është porosi e qartë dhe e prerë se incidente të tilla nuk do të lejohen dhe autorët nuk do të kalojnë pa ndëshkim, siç ndodhte në të kaluarën,” theksohet në deklaratë.
Në të njëjtën kohë, VLEN kritikoi ashpër partinë Alternativa për Kosovën dhe Integrimin (AKI) dhe strukturat që lidhen me të, duke i akuzuar për përpjekje të qëllimshme për të politizuar incidentin dhe për të përfituar nga nxitja e tensioneve ndëretnike.
“Qytetarët e dinë mirë se kush tenton të përfitojë nga këto tensione, duke mos kursyer as fëmijët e shkollave. Ata gjithashtu kujtojnë se raste të tilla ndodhin vetëm kur BDI-ja është në vështirësi para zgjedhjeve,” thuhet në reagim.
Në fund, VLEN riafirmoi angazhimin e saj për bashkëjetesë, barazi qytetare dhe sundim të ligjit.
“Angazhohemi për një shtet demokratik, ku të gjithë qytetarët janë të barabartë dhe ku kriminelët përballen me drejtësinë.”
Shqip