Kandidati i BDI-së për Komunën e Çairit, Bujar Osmani thekson se VMRO-DPMNE-ja duke e parë se BDI është më e fuqishme se VLEN-i, po u dërgon emisarë me qëllim që t’i ngrohin marrëdhëniet për një bashkëpunim të ardhshëm në qeveri.
“VMRO-DPMNE çdo ditë na dërgon porosi se si t’i ngrohim marrëdhëniet pasi që anketat tregojnë 3 ndaj 1 fitore të Aleancës Kombëtare për Integrim përballë VLEN-it. Ka porosi të vazhdueshme, kontakte nga VMRO-DPMNE deri te BDI për ngrohjen e marrëdhënieve edhe pse në opinion në vazhdimësi thuhet e kundërta me qëllim kuptohet për matematikë zgjedhore, megjithatë unë patjetër duhet të jem i sinqertë pasi nuk mundem më t’i dëgjoj këto qëndrime të ndryshme, një privatisht, tjetër publikisht”, deklaroi Bujar Osmani, BDI.
I menjëhershëm ka qenë reagimi i VMRO-DPMNE-së, e cila përgënjeshtroi Osmanin. Sipas partisë së Hristijan Mickoskit, BDI i premton anëtarësisë së dëshpëruar hyrjen në qeveri, për ta fshehur krimin dhe korrupsionin.
“Bujar Osmanit ose nuk i kanë treguar, ose nuk dëshiron të kujtohet në kohën kur ekipi negociues i BDI-së la fletë të bardhë para VMRO-DPMNE-së, të gatshëm të plotësojnë çdo kërkesë vetëm që të mbeten në qeverinë e cila u mund në zgjedhje. Atëherë udhëheqësit e BDI-së nuk silleshin kështu guximshëm të cilët sot fuqishëm godasin gjoksin. Kreu i BDI-së është transformuar në elitë milionerësh, derisa populli jeton në varfëri. BDI u premton funksione dhe hyrje në qeveri, anëtarëve të tyre të dëshpëruar, duke shpresuar se do ta fshehin korrupsionin e tyre dhe marrëveshjet kriminale”, thonë nga VMRO-DPMNE.
Koment ndaj deklaratës së Osmanit, dha edhe Izet Mexhiti nga VLEN, i cili theksoi se oponenti i tij bazohet te anketa të rrejshme dhe porosi të koduara që vetëm ai i di.
“Duke mos pasur vizion se si të udhëhiqet Çairi, duke qenë politikan i salloneve çdoherë bazohet pra te Borrelli, Lajçaku, te porositë që i vijnë e nuk i tregon. E dini që edhe në të kaluarën ka pasur disa raste me disa porosi të koduara që i di vetëm ai. Vazhdojnë me anketa të rrejshme, duke mos i shpalosur agjencitë, do të vazhdojnë me “fake” kampanjë sepse kështu janë mësuar”, deklaroi Izet Mexhiti, VLEN. /Alsat.mk
Shqip