Edhe tetë muaj pas arratisjes së ish zëvendës kryeministrit Artan Grubi dhe ish drejtorit të Lotarisë Shtetërore Përparim Bajrami, autoritetet nuk i kanë përfunduar aktivitetet, të cilat siç thonë ata i ndërmarrin për sigurimin e personave në arrati, shkruan Alsat.
Siç na njoftuan nga Prokuroria Publike, ndaj tyre është shpallur fletë arrest ndërkombëtar dhe po bashkëpunohet edhe me organet e huaja.
“Prokuroria Publike ndërmerr të gjitha aktivitetet në kompetenca të saj për sigurimin e personave, përfshirë dhe dhënien e urdhrave për fletarreste. Pas lëshimit të fletarresteve, veprojnë edhe organet policore vendase edhe të huaja, të cilat janë kompetente për të siguruar personat”, thonë nga Prokuroria Publike.
Masa ndërmerr edhe Ministria e Punëve të Brendshme por, asgjë konkrete. Nga atje na thanë se nëse ne dimë diçka si gazetarë, t’u tregojmë në stacion policor.
“MPB ndërmerr masa taktiko-operative për lokalizimin dhe privimin nga liria të personave për të cilët pyesni. Nëse posedoni informacione për lokacionin e tyre, të njëjtat ndani me organet e ndjekjes në stacionin më të afërt policor”, thonë nga MPB.
Më 17 dhjetor të vitit të kaluar, Grubi u largua nga vendi me makinë diplomatike dhe u arratis. Autoritetet kompetente i kanë bërë thirrje disa herë që të kthehet, por deri më sot kjo nuk ka ndodhur. Në fillim të qershorit, Grubi në rrjetet sociale për herë të parë publikoi fotografi nga uratat për ditëlindje nga miqtë e tij.
Por në fotografitë nuk tregohej lokacioni se prej ku janë publikuar. Grubi kërkohet për keqpërdorime me tenderët në Lotarinë Shtetërore respektivisht për shkaktimin e dëmit prej disa dhjetëra milionë euro. Ndërkohë, ai përfundoi gjithashtu në listën e zezë të SHBA-së për korrupsion dhe ryshfet në rast që lidhej me ish-shefin e DSK-së, Sasho Mijallkov.
Përveç Grubit, për keqpërdorime në Lotarinë Shtetërore kërkohet edhe ish-kreu i këtij institucioni, Përparim Bajrami. Avokati i tij në atë kohë, për Alsat, tha se ai nuk ishte në arrati, por ishte shpërngulur nga vendi.
Megjithatë, deri më sot, publiku nuk e di vendndodhjen e tij dhe autoritetet kompetente janë ende në kërkim të tij. Ekziston edhe një flet arrest ndërkombëtar për Vasko Kovaçevskin- i dyshuari kryesor në rastin “Aditiv” për manipulim të tenderëve për furnizimin e qymyrit për TEC Manastir dhe TEC Osllomej, ai dyshohet për krim në vlerë prej gjashtë milionë e gjysmë euro.
Gjykimi në këtë rast filloi javën e kaluar kurse Kovaçevski, i cili është në arrati, do të gjykohet në mungesë./ Alsat.mk
Shqip