Trump ndan letrën nga presidenti palestinez Abbas përpara takimit me Netanyahu

Donald Trump ndau një foto të martën vonë të një letre nga presidenti palestinez Mahmoud Abbas që i uronte “forcë dhe siguri” kandidatit republikan për president, pas një tentative për vrasje ndaj tij.

Sipas mediave të huaja, në letër, Abbas e quajti atentatin një “akt dobësie”.

Në përgjigje, Trump shkroi: “Mahmoud,…. Faleminderit. Gjithçka do të jetë mirë. Urimet më të mira”.

Edhe kandidati për president nënshkroi më poshtë përgjigjen e tij në të njëjtën letër.

Dhe Trump e ndau letrën në platformën e tij “Truth Social” me mbishkrimin ku shkruhej: “Mezi pres të takoj Bibi Netanyahun të premten dhe akoma më shumë për të arritur paqen në Lindjen e Mesme! DJT”, ka shkruar ai, duke përdorur pseudonimin e kryeministrit izraelit Benjamin Netanyahu.

Ndryshe, Trump do të presë kryeministrin izraelit të premten në resortin e tij në Palm Beach, Florida, një shenjë që të dy po kërkojnë të përmirësojnë lidhjet.

Takimi do të jetë i pari i tyre që nga fundi i presidencës së Trump, gjatë së cilës të dy krijuan lidhje të ngushta dhe vjen në një kohë tensionesh midis Netanyahu dhe presidentit demokrat Joe Biden lidhur me luftën vdekjeprurëse të Izraelit kundër militantëve të Hamasit të mbështetur nga Irani në Gaza.

Ministria e shëndetësisë në Gaza tha të mërkurën se të paktën 39,145 njerëz janë vrarë në më shumë se nëntë muaj luftë.

Të paktën 90,000 njerëz në territorin palestinez janë plagosur që nga fillimi i luftës kur militantët e Hamasit sulmuan Izraelin më 7 tetor.

Netanyahu gjithashtu do të takohet me presidentin në largim Biden dhe kandidaten e mundshme presidenciale demokrate dhe zëvendës-presidenten aktuale të SHBA-së, Kamala Harris.