Shefi i OKB-së: “Diçka nuk shkon” me operacionet izraelite, mijëra fëmijë të vrarë në Gaza

Kreu i OKB-së tha sot se mijëra fëmijë në Rripin e Gazës janë vrarë, gjë që tregon se ka “diçka qartësisht të gabuar në mënyrën se si po kryhen operacionet ushtarake”, transmeton Anadolu.

“Çdo vit, numri më i lartë i vrasjeve të fëmijëve nga ndonjë prej aktorëve në të gjitha konfliktet që ne jemi dëshmitarë është maksimumi në qindra”, tha Antonio Guterres në një intervistë për Reuters Next në New York.

“Kemi mijëra fëmijë të vrarë vetëm në disa ditë në Gaza”, tha ai.

Guterres theksoi nevojën për një armëpushim humanitar, si dhe lejimin e lirimit të pengjeve dhe lejimin e “hyrjes masive” të ndihmave në Gaza.

Duke e përshkruar situatën në Gaza si “të tmerrshme” dhe “katastrofike”, shefi i OKB-së vuri në dukje se hyrja e karburantit në Gaza ende nuk është autorizuar dhe uji është “shumë i kufizuar”, ndërsa ka mungesë të ilaçeve në spitale.

“Është thelbësore që ligjet e luftës të respektohen”, tha ai. “Dhe një nga gjërat që ne i themi Izraelit, është shumë e rëndësishme që ligjet e luftës të respektohen plotësisht”, shtoi Guterres.

Izraeli nisi sulme masive ajrore dhe tokësore në Rripin e Gazës pas një operacioni ndërkufitar nga Hamasi më 7 tetor.

Të paktën 10.569 palestinezë, duke përfshirë 4.324 fëmijë dhe 2.823 gra, janë vrarë.

Sipas shifrave zyrtare, numri i të vdekurve në Izrael është afër 1.600.