SHBA për Vuçiqin: Kosova është shtet sovran, përmbahuni nga veprimet e njëanshme

Departamenti Amerikan i Shtetit i bëri thirrje Serbisë dhe Kosovës që të përmbahen nga retorika nxitëse, veprimet e pakoordinuara dhe aktet legjislative që janë në kundërshtim me përpjekjet për normalizim, si reagim ndaj fjalimit publik të presidentit serb Aleksandar Vuçiq të disa ditëve më parë.

Gjatë fjalimit në Pallatin e Serbisë, Vuçiq prezantoi kërkesat dhe lëvizjet e Serbisë lidhur me situatën në Kosovë, të ndara në pesë fusha, dhe theksoi se me këtë qëllim do të fillojë një fushatë diplomatike globale dhe se do të bisedojë me 60 liderë botërorë deri në fund të nëntorit, të cilit do t’i paraqesë shtatë pikat e nevojshme për përparimin në dialog.

I pyetur për të komentuar masat, Departamenti i Shtetit përsëriti qëndrimin e tij për dialogun ndërmjet Prishtinës dhe Beogradit, me ndërmjetësimin e Bashkimit Evropian, duke kujtuar se “Kosova është shtet i pavarur dhe sovran dhe se dëshiron të shihet në strukturat ndërkombëtare. .”

“Shtetet e Bashkuara vazhdojnë të mbështesin fuqishëm dialogun e ndërmjetësuar nga BE-ja ndërmjet Kosovës dhe Serbisë, si një mënyrë për të arritur marrëdhënie paqësore dhe produktive ndërmjet dy vendeve. E ardhmja e të dy vendeve është në institucionet evropiane, procesi i ndërmjetësuar nga BE-ja është e vetmja rrugë përpara. Edhe një herë i bëjmë thirrje Serbisë dhe Kosovës që të përmbahen nga përshkallëzimi i retorikës, veprimeve të pakoordinuara apo akteve legjislative që kundërshtojnë normalizimin e marrëdhënieve apo kërcënojnë stabilitetin dhe sigurinë”, thuhet në reagim.

Për Uashingtonin, Kosova është një “shtet sovran, i pavarur dhe multietnik”, të cilin ata duan ta shohin “të integruar plotësisht në strukturat euroatlantike dhe ndërkombëtare”.

Vuçiq më herët ka deklaruar se ndër hapat që do të ndërmarrë Serbia është që Kuvendi brenda 45 ditëve të miratojë një vendim me të cilin konstatohet paligjshmëria e të gjitha organeve dhe institucioneve të krijuara në territorin e Kosovës pas shpalljes ilegalisht të pavarësisë, si dhe mosekzistenca të akteve të tyre, duke vënë në dukje se kontrolli ndërkombëtar i Kosovës është vendosur me pëlqimin e Republikës së Serbisë, më pas të Republikës Federale të Jugosllavisë.