Administrata e presidentit amerikan Joe Biden njoftoi të premten një paketë të re ndihme ushtarake prej 425 milionë dollarësh për Ukrainën, në një përpjekje për të forcuar ushtrinë e Kievit gjatë një kundërofensive të vazhdueshme për të rimarrë territoret e pushtuara nga Rusia, raporton Anadolu.
Paketa përfshin transferimin e armëve me vlerë 125 milionë dollarë tashmë në stoqet e SHBA-së si dhe 300 milionë dollarë shtesë në fondet e Iniciativës së Ndihmës për Sigurinë e Ukrainës (USAI).
“Armët në stoqet e SHBA-së përfshijnë municion shtesë për Sistemet Kombëtare të Raketave të Avancuara Tokë-Ajër (NASAMS) dhe Sistemet e Raketave të Artilerisë së Lëvizshmërisë së Lartë (HIMARS), si dhe më shumë fishekë artilerie 155 mm dhe 105 mm, armë antitank dhe më shumë se tre milionë armë të vogla”, tha Pentagoni.
Fondet e USAI-t janë caktuar për prokurimin e sistemeve të drejtuara me lazer kundër mjeteve ajrore pa pilot.
“Derisa Rusia ta përfundojë këtë luftë duke tërhequr forcat e saj nga Ukraina dhe duke ndalur sulmet e saj brutale, SHBA-ja dhe koalicioni që kemi ndërtuar prej më shumë se 50 vendesh do të qëndrojnë me Ukrainën”, tha Sekretari i Shtetit, Antony Blinken.
