Rritet në 56 numri i të vdekurve nga të shtënat izraelite në Bregun Perëndimor

Gjithsej 56 palestinezë janë vrarë nga të shtënat izraelite në Bregun Perëndimor të pushtuar që nga java e kaluar, tha sot Ministria palestineze e Shëndetësisë, transmeton Anadolu.

Viktima e fundit është një palestinez i qëlluar nga ushtarët izraelitë në veri të Bregut Perëndimor.

Fundjavën e kaluar, në një përshkallëzim dramatik të tensioneve në Lindjen e Mesme, forcat izraelite nisën sulme intensive ushtarake kundër Rripit të Gazës, në përgjigje ndaj një ofensive ushtarake nga grupi palestinez Hamas në territoret izraelite.

Konflikti filloi më 7 tetor, kur Hamasi nisi operacionin “Tufani i Aksasë”, një sulm i befasishëm me shumë drejtime, duke përfshirë një breshëri raketash dhe infiltrimesh në Izrael nëpërmjet tokës, detit dhe ajrit.

Hamasi tha se operacioni ishte në hakmarrje për bastisjet ndaj Xhamisë Al-Aksa në Kudsin Lindor të pushtuar dhe dhunës në rritje të kolonëve izraelitë kundër palestinezëve.

Ushtria izraelite më pas nisi operacionin “Shpatat e Hekurta” kundër objektivave të Hamasit brenda Rripit të Gazës.

Përgjigjja e Izraelite është shtrirë deri në ndërprerjen e furnizimit me ujë dhe energji elektrike në Gaza, duke përkeqësuar më tej kushtet e jetesës në një zonë që është përfshirë nën një rrethim paralizues që nga viti 2007.

Më shumë se 3.600 njerëz janë vrarë që nga shpërthimi i konfliktit më 7 tetor, duke përfshirë mbi 2.300 palestinezë dhe 1.300 izraelitë.