Publikohet lista e kompanive me fitime më të mëdha në Maqedoni, ja cila mban vendin e parë!

Bursa e Maqedonisë së Veriut për letrat me vlerë afatgjate ka publikuar listën e shoqërive aksionare më fitimprurëse të Maqedonisë së Veriut, për nëntë muajt e parë të këtij viti.

E para në listën e kompanive më fitimprurëse në nëntë muajt e parë të vitit është Banka Komerciale, me fitim prej 50 milionë eurove, ose më saktë 49.6 milionë euro. Banka shënon rritje të madhe krahasuar me të njëjtën periudhë të vitit të kaluar, gjegjësisht rritje prej 64.7 për qind, përcjell “Tv21”.

Vijon një tjetër bankë, “Stopanska banka”, fitimi i së cilës është 40,3 milionë euro për tre tremujorët e parë të këtij viti, që paraqet rritje krahasuar me vitin e kaluar për 20.3 për qind.

Edhe në vendin e tretë qëndron një bankë tjetër. Banka “NLB” me një fitim neto prej 39.6 milionë euro, që paraqet rritje prej 19.1 për qind krahasuar me periudhën e njëjtë të vitit të kaluar.

Telekom Maqedoni është i katërti në listë për nga profitabiliteti, duke realizuar pothuajse 27 milionë euro fitim neto, që paraqet rritje për gati 30 për qind krahasuar me periudhën e njëjtë të vitit të kaluar.

“Alkaloid” në nëntë muajt e parë të vitit ka realizuar 21.1 milionë euro fitim, që shënon rritje prej 13.6 për qind krahasuar me periudhën e njëjtë të vitit të kaluar.

Çimentorja USJE po i rikthehet rrugëve të profitabilitetit të lartë. Në nëntë muajt e parë të vitit ka një fitim prej 18.1 milionë euro, që është një rritje fantastike prej 79 për qind krahasuar me të njëjtën periudhë të vitit të kaluar.

“Makpetrol” është në vendin e shtatë me 10.7 milionë euro fitim, që është një rezultat pak më i dobët se viti e kaluar për 33 për qind.

Kombinati i Mermerit Prilep është i teti me fitim prej 9,34 milionë euro, me rënie të lehtë prej 6,5 për qind.

UNI Bank është në vendin e nëntë për nga përfitimi, me një fitim neto prej 5.5 milionë euro në nëntë muajt e parë, që paraqet gjithashtu një rritje të shkëlqyer prej 35 për qind.

OKTA është në pozitën e dhjetë, me një fitim prej 5.1 milionë euro, ku ka një rënie prej 59 për qind.

Pas OKTA-s, vjen “Birraria e Prilepit” me fitim prej 3,34 milionë euro në nëntë muaj, që shënon rritje fantastike prej 90 për qind, pastaj OILKO, me fitim prej 3,26 milionë euro ose rritje prej 42 për qind.

Vijon kompania e verës “Tikvesh” me fitim prej 2.9 milionë euro në nëntë muajt e parë, që shënon rritje prej 181 për qind, e ndjekur nga “Maxtil” me një fitim prej 2,8 milionë euro në nëntë muajt e parë, por ku është regjistruar ulje për shkak të tatimit solidar.