Në prag të zgjedhjeve të ardhshme, përfaqësues të Prokurorisë publike të Republikës së Maqedonisë së Veriut dhe Komisionit shtetëror për parandalimin e korrupsionit (KSHPK) kanë mbajtur takim pune me qëllim forcimin e koordinimit ndërmjet dy institucioneve për monitorim efikas të procesit zgjedhor.
Siç kanë informuar sot nga PP, në takimin të drejtuar nga prokurori publik Xhelal Bajrami dhe kryetarja e KSHPK-së Tatjana Dimitrovska, janë shqyrtuar përgatitjet dhe kompetencat e secilit institucion me qëllim të sigurimit të një procesi zgjedhor të qetë dhe të drejtë. Vëmendje e veçantë i është kushtuar mekanizmave për sanksionimin e çdo tentative për parregullsi.
Bajrami ka theksuar rëndësinë e Komisionit për monitorimin e parregullsive dhe veprave penale lidhur me zgjedhjet, duke sqaruar përbërjen dhe mënyrën e funksionimit të tij. Ai ka prezantuar edhe procesin e trajtimit të rasteve dhe sistemin e monitorimit të njoftimeve përmes adresës elektronike izbori@jorm.mk
Dimitrovska ka ndarë aktivitetet e KSHPK-së në periudhën parazgjedhore, duke përfshirë edhe përpjekjet për monitorimin e shfrytëzimit të automjeteve zyrtare nga institucionet.
Që të garantohet transparencë dhe përgjegjësi, Prokuroria publike dhe KSHPK-ja do të mbajnë komunikim të drejtpërdrejtë dhe do të koordinohen gjatë veprimit të të gjitha raporteve për parregullsitë zgjedhore.
