Prokuroria e ka vlerësuar si të parëndësishme ekspertizën gjermane për zjarrin në spitalin modular në Tetovë

Prokurorët e Prokurorisë Publike të Shkupit kërkuan që Gjykata në Tetovë të refuzojë propozimin e mbrojtjes për të dëgjuar ekspertin që ka përgatitur raportin gjerman për zjarrin në spitalin modular, me arsyetimin se ai është “i parëndësishëm” për këtë rast.

Kështu dëgjohet nga audio-incizimi i publikuar nga Laboratori i Gazetarëve Hulumtues (IRL), i bërë në njërën nga seancat e procesit gjyqësor për tragjedinë, në të cilën u gjykuan dy drejtorët dhe një mjek në spitalin e Tetovës.

Ndonëse ekspertiza e ekspertëve gjermanë është bërë me kërkesë të Prokurorisë Publike, vetë prokurorët, siç thuhet nga IRL, e kanë paraqitur ekspertizën në cilësinë e provës, pa sqaruar se për çfarë prove bëhet fjalë, dhe më pas kanë kërkuar nga gjykata që të mos pranojë propozimin e mbrojtjes për t’u thirrur edhe eksperti gjerman për të dëshmuar. Përveç vlerësimit se është “i parëndësishëm”, prokurorët e kundërshtojnë kërkesën duke thënë se mbrojtja po tenton vetëm të zvarritë gjykimin.

Audio regjistrimi i publikuar, është nga seanca gjyqësore e mbajtur më 02.03.2023 në Gjykatën Themelore në Tetovë. Atë ditë, dy prokurorët e Prokurorisë Publike të Shkupit, Zorica Pavloviq dhe Dejan Petreski, u deleguan nga prokurori publik i Republikës, Ljubomir Joveski.

Në fillim të audio-incizimit, i cili zgjat 5 minuta e 25 sekonda, flet avokati mbrojtës i të akuzuarit Florim Besimi, i cili kërkon të dëgjohet eksperti i institutit të mjekësisë ligjore të Shërbimit Penal Federal të Gjermanisë i cili e ka përgatitur ekspertizën.

Propozimit të mbrojtjes së Besimit i bashkohen edhe pjesa tjetër e mbrojtësve.

Pas kësaj, sipas procesverbalit të publikuar, nëpërmjet telefonit paraqitet edhe një nga dy prokurorët (sipas zërit mashkullor është Dejan Petreski) dhe thotë:

“Prokuroria e kundërshton dhe nuk pajtohet me këtë propozim të mbrojtjes së të pandehurve për dy arsye themelore. Sugjerimi dhe prezantimi i parë dhe themelor i provave të tilla në këtë procedurë penale është i pakuptimtë, në lidhje me rrethanë që mbrojtja e të akuzuarit Florim Besimi e ka propozuar është jashtë objektit të akuzës. Dhe arsyeja e dytë është se një propozim i tillë ka të vetmin qëllim dhe synim zgjatjen e rrjedhës së kësaj procedure penale”.

Mbrojtja menjëherë i është përgjigjur kundërshtimit, duke i vlerësuar si të pabazuara pretendimet e prokurorit publik se mbrojtja synon ta zvarritë procesin gjyqësor.

Pas kësaj gjyqtari Jordan Velkovski e refuzon propozimin e mbrojtjes, duke theksuar se konstatimi i tillë (raporti i ekspertit gjerman) nuk ka lidhje me lëndën e aktakuzës.

Përfundimet e raportit gjerman

Sipas dokumenteve të publikuara nga IRL në dokumentarin me titull “Vrasja në Tetovë”, ekspertët gjermanë janë të qartë në konkluzionet e tyre. Arsyeja e parë e përhapjes së shpejtë të zjarrit, sipas tyre, është prania e një sasie të madhe oksigjeni në kombinim me poliuretani apo pur-panele nga të cilat është ndërtuar spitali.

Arsyeja e dytë është mungesa e barrierave kundër zjarrit që do të parandalonin përhapjen e mëtejshme të zjarrit ose më së paku do ta vështirësonin atë, vendosja e të cilave është detyrim ligjor sipas standardeve të sigurisë. Dhe arsyeja e tretë është ndërtimi i hapur i ndërtesës në papafingo ku gazi i dëmshëm mund të përzihet me oksigjenin dhe të përhapet kudo në një kohë shumë të shpejtë.

Ndryshe, më 5 qershor të këtij viti, Gjykata Themelore në Tetovë ka nxjerrë aktgjykim për zjarrin në spitalin modular që ndodhi më 8 shtator 2021, ku humbën jetën 14 persona. Drejtorët e akuzuar Florin Besimi dhe Artan Etemi dhe personi juridik Spitali klinik Tetovë, për veprën penale të veprave të rënda kundër sigurisë së përgjithshme, janë dënuar me kusht prej një viti e gjashtë muaj, nëse nuk e përsërisin veprën penale në tri vitet e ardhshme.

Gjykata shpalli pafajësinë për mjekun Boban Vuçevski, i cili akuzohej për veprën penale të mosveprimit sipas rregullave shëndetësore. Së bashku me Vuçevskin, Spitali Klinik u lirua nga vepra penale e mosveprimit sipas rregullave shëndetësore. Spitalit Klinik i është shqiptuar gjobë prej një milion denarë.