Nga 1 janari çmimi i rrymës elektrike pritet të rritet, të paktën për 5%, për sa do të rritet tatimi i vlerës së shtuar, që pritet të jetë 10%. Kjo do të thotë se për rrymën do të vazhdojë të vlejë norma preferenciale si pjesë e masave antikrizë të Qeverisë, të ndërmarra para një viti e gjysmë, kur tatimi nga 18% u ul në 5%. Kryetari i Komisionit Rregullator të Energjetikës, Marko Bislimovski nuk përjashton edhe rritje më të lartë, sepse, siç theksoi “çmimi në bursë për momenitn është jashtëzakonisht i lartë”.
“Së pari ta shohim me çfarë çmimi EEM do t’i ofrojë EVN Home. Për momentin ai çmim është 48 euro për një megavat orë, që është shumë më i ulët se çmimi real i EEM-së. Më tej duhet të shohim sa do të jenë shpenzimet për humbjen e energjisë elektrike, përkatësisht çmimi me të cilin do të ofrohet në tenderët që i kanë shpallur MEPSO dhe EEM. Në qoftë se në atë tenderë ka çmime jashtëzakonisht të larta, që është shumë e sigurtë sepse sot çmimi në KUPEKS është mbi 400 euro për një megavat orë, do të shohim nëse atëherë do të ketë nevojë që EEM sërish të japë çmim shumë më të ulët për humbjet se ai që mund të jetë në tregun e lirë” – tha Bislimovski.
Bislimovski, në konferencën e sotme për media në përgjigje të pyetjes së gazetarëve tha se struktura e katër blloqeve tarifore për konsumin e energjisë elektrike nuk do të ndryshojë nga 1 janari sepse ka dhënë rezultate.
Bislimovski deklaroi se që nga 1 korriku, pas futjes së modelit të ri tarifor, konsumi i energjisë elektrike nga amvisëritë është ulur me 16 për qind.
“Rezultatet që kemi nga korriku deri në tetor janë të mira, me mbi 16 për qind ulje të konsumit. Mirëpo, këta janë muaj që nuk kishte nevojë të ndizeshin kondicionerët, sepse ishte më i ngrohët. Nuk janë muajt më referues. Do të shohim se si do të ndikojë çmimi aktual i blloqeve në konsum, diku nga nëntori deri në shkurt”, tha Bislimovski.
KlanMacedonia/
