New York Times shkruan për shqiptaren që po drejton kompaninë më të madhe në botë të Inteligjencës Artificiale

Për shumë vite, Mira Murati ka punuar në “prapaskenën” e OpenAl duke mbikëqyrur zhvillimin e produkteve si ChatGPT dhe DALL-E.

Mediat raportojnë se tani ajo është emëruar si shefe e përkohshme ekzekutive e kompanisë.

Ajo u ngritë në detyrë përkohësisht, menjëherë pasi bordi shkarkoi nga puna Sam Altman.

Shumë media botërore, ndër to edhe gazeta e madhe amerikane, New York Times i ka kushtuar një artikull inxhinieres shqiptare, duke i njohur kontributin në fushën e Inteligjencës Artificiale.

Mira Murati, e lindur në Shqipëri dhe e shkolluar në Kanada, është një inxhiniere mekanike e cila iu bashkua OpenAl në vitin 2018.

Raportohet se para se t’i bashkohej OpenAl, ajo ishte pjesë e kompanisë Tesla, ku luajti një rol kryesor në zhvillimin e veturës Model X dhe Leap Motion, shkruan më tutje gazeta.

Mira iu bashkua OpenAl në kohën kur ajo ishte një organizatë jofitimprurëse, e përkushtuar për të siguruar që inteligjenca e përgjithshme artificiale të ishte në dobi të njerëzimit.

“Çfarë mund të ketë tjetër më frymëzuese sesa ngritja dhe rritja e inteligjencës kolektive të njerëzimit”, kishte thënë atëbotë ajo.

Fillimisht ajo ishte anëtare e ekipit drejtues dhe kishte për detyrë të ekzekutonte vendimet e bordit në të gjithë kompaninë.

Më vonë ajo mori përgjegjësinë për shpërndarjen e gjeneratorit të imazhit, DALL-E dhe gjeneratorit të tekstit ChatGPT, i cili tërhoqi miliona përdorues pas prezantimit vitin e kaluar.

Edhe pse ajo ka mbajtur titullin e shefes së teknologjisë që nga viti i kaluar, punonjësit aktualë dhe të mëparshëm thanë se Murati kishte funksionuar si shefe e operacioneve të kompanisë. Ajo u sigurua që inxhinierët e saj të zhvillonin në kohë versionet e ChatGPT.

Ajo gjithashtu trajtoi marrëdhëniet e kompanisë me Microsoft-in, një investitor dhe partner që ka vendosur teknologjinë e OpenAI-t dhe ka ndihmuar në formimin e politikës së saj të inteligjencës artificiale në Uashington dhe Evropë.

“Ajo ka demonstruar aftësi për të krijuar ekipe me ekspertizë teknike, zgjuarsi tregtare dhe një vlerësim të thellë për rëndësinë e misionit”, shkroi Satya Nadella, shefe ekzekutive e Microsoftit, në një artikull për të për revistën Time. “Si rezultat, Mira ka ndihmuar në ndërtimin e disa prej A.I. më emocionuese që kemi parë ndonjëherë”.

Ndryshe, deri në një vendim të radhës të kompanisë, Mira Murati do vazhdojë të jetë shefe ekzekutive e OpenAl. /Telegrafi/