Kush është ministri i ardhshëm i Mbrojtjes i Ukrainës, Rustem Umerov?

Rustem Umerov, i cili do të bëhet ministri i ri i Mbrojtjes i Ukrainës, është një anëtar kryesor i komunitetit tatar të Krimesë, i cili ka përfaqësuar vendin e tij në negociatat e ndjeshme me Rusinë.

Sipas mediave të huaja, përcjell Telegrafi, Umerov lindi në Uzbekistanin Sovjetik, vendi ku familja e tij u internua nën Stalinin dhe u kthye në Krime në Ukrainë si fëmijë kur tatarët u lejuan të ktheheshin në vitet 1980 dhe 1990.

Myslimani 41-vjeçar filloi në biznesin e telekomit në vitin 2004 dhe u zgjodh në parlament në vitin 2019.

Atje ai shërbeu si bashkë-kryetar i “Platformës së Krimesë”, një përpjekje diplomatike ndërkombëtare që synon të kthejë gadishullin e aneksuar nga Rusia në vitin 2014.

Ai ka punuar për vite si këshilltar i liderit historik të tatarëve të Krimesë, Mustafa Dzhemilev.

Rusia mori kontrollin e Krimesë nga Ukraina në vitin 2014 dhe shtyu një referendum mbi aneksimin që u dënua si i paligjshëm nga Ukraina dhe aleatët e saj perëndimorë.

Dhe komuniteti tatar, i cili përbënte 12-15% të dy milionë banorëve të Krimesë, bojkotoi kryesisht votimin.

Moska më pas e ndaloi Mejlisin – asamblenë tradicionale të pakicës myslimane tatar – duke e shpallur atë një organizatë ekstremiste dhe që atëherë ka burgosur anëtarë të komunitetit, duke përmendur shqetësimet e sigurisë.

Si pas aneksimit ashtu edhe pas fillimit të pushtimit në shkallë të plotë të Rusisë, Umerov ka marrë pjesë në bisedimet e prapaskenave me zyrtarët rusë, duke përfshirë negocimin e shkëmbimit të të burgosurve të profilit të lartë dhe evakuimin e civilëve.

Ai ishte pjesë e delegacionit të Ukrainës në negociatat me Rusinë në javët e para të luftës dhe mori pjesë në bisedimet për krijimin e një korridori eksporti për grurin ukrainas përmes Detit të Zi.

Rusia që atëherë është tërhequr nga marrëveshja e grurit, duke akuzuar Ukrainën dhe aleatët e saj për dështimin për të mbështetur një pjesë të marrëveshjes për të lehtësuar eksportet ruse.

Ndërkohë në shtator të vitit të kaluar ai u emërua kreu i Fondit të Pronës Shtetërore – një rol veçanërisht i vështirë në Ukrainë, ku procesi i privatizimit është rrënuar nga korrupsioni.

Në deklaratën e tij video që njoftoi zëvendësimin të dielën, presidenti Volodymyr Zelensky tha se deputetët do të thirren për të votuar mbi nominimin e Umerov këtë javë.

Parlamenti “e njeh mirë këtë person dhe Umerov nuk ka nevojë për ndonjë prezantim shtesë”, tha ai.