Interesim i ulët për vende të caktuara të punës

Nëse kaloni përreth Zonës së Lirë Teknologjike Industriale të Shkupit, vëreni tabela të mëdha: “Kërkojmë punëtorë”. Jo shumë vite më parë, për 100 vende të punës në këtë zonë aplikonin mbi 1,000 qytetarë, madje të rinjtë duhej të gjenin lidhje për intervistim. Tani, janë kompanitë, të cilët kërkojnë punëtorë duke ulur edhe kriteret e punësimit. Por, sërish do duhet edhe mbi 4 mijë punëtorë për 3 vjet.

“Bëhet fjalë për marrëveshjet e reja që janë firmosur këtë vit, diku 4,000-4,500 vende të reja të punës do të duhet të hapen në 3 deri në 5 vitet e ardhshme, sipas plan veprimit diku më shpejtë diku më ngadalë. Investitorët, me të cilët arritëm ujdi në 18 muajt e fundit nuk janë vetëm nga industria automobilistike, kemi investitor edhe ne sektorin e energjetikës, të farmaceutikës dhe materialeve ndërtimore. Deri tani kanë dominuar të pa kualifikuarit ose me profil të ulët, tani bëhet fjalë për kalibër të lartë – inxhinierë”, tha Jovan Despotovski, Drejtor i TIRZ Shkup.

Por, nga Agjencia e Punësimit thonë se kërkues aktiv të punës ka të të gjitha profileve. Nga ky institucion thonë se hendeku është i thellë në mes vendeve të lira të punës dhe atyre që janë kërkues për punë.

“Në sistemin e Agjencisë së punësimit si të pa punë deri në fund të tetorit figurojnë 160,566 shtetas, prej të cilëve 113,893 janë kërkues aktiv në Entet e punësimit, ndërsa 46,673 janë kërkues pasiv të punës. Në anën tjetër në gjithë tregun e punës nga të gjitha profilet 9,045 vende pune janë të lira në Maqedoni”, thonë nga Agjencia e Punësimit të RMV-së.

Në të gjitha Zonat e lira teknologjike industriale në vend janë 16,100 të punësuar. Vetëm këtë vit janë punësuar mbi 15% apo 2,000 shtetas nëpër fabrikat e ndryshme që operojnë në këto zona. Trendi është në rritje nga që eksporti për 10 muaj sivjet sa i gjithë viti i kaluar ka kaluar pritshmëritë e autoriteteve. Sipas të dhënave zyrtare disa prej të punësuarve mbeten me pagën minimale dhe për të arritur një pagë më të lartë ato i plotësojnë me orë shtesë dhe kujdestari./Alsat.mk