Ibrahimi: Kurti i përgënjeshtroi për gjuhën shqipe! Në vend se të turpërohen dhe të heshtin, vazhdojnë të mashtrojnë

Reagimi të shumta pati pas deklaratës së kryeministrit të Kosovës, Albin Kurti që e pati pë gjuhën shqipe në Maqedoninë e Veriut, që së fundmi, ka reaguar edhe kryetari i Alternativës, Zeqirija Ibrahimi, përcjell TV21. Ibrahimi tha se, në vend se të turpërohen dhe të heshtin që kanë mashtruar për vite të tëra, ata vazhdojnë të mashtrojnë, me shpresë se dikush mund t’u besojë.

Tutje, Ibrahimi shtejlloi tri pika, duke e mbështetur deklaratën e Kurtit se gjuha shqipe nuk është zyrtare në RMV.

Sipas tij, shqipja është gjuhë e përkthyer prandaj asnjë institucion nuk arkivon dokumente në gjuhën shqipe pa qenë në të teksti në maqedonisht. Ibrahimi përfundoi se, Kurti i ka përgënjështruar mashtrimet e tyre

“Nuk i hanë politikanët e Kosovës mashtrimet e Soravisë

Sot, kur kryeministri i Republikës së Kosovës deklaroi se shqipja nuk është zyrtare në Maqedoninë e Veriut, qenkan ngritur i hurit e i konopit, që nga zyrtarët e pronarët e Soravisë e deri te të a.q. analistë, të cilëve u mungon grazhdi, duke “argumentuar” se shqipja qenka zyrtare në RMV.

Në vend se të turpërohen dhe të heshtin, madje të kërkojnë falje që kanë mashtruar për vite të tëra, ata edhe sot vazhdojnë të mashtrojnë, me shpresë se dikush mund t’u besojë.

Këtu më poshtë po e sjell tekstin e preambulës së kushtetutës së RMV-së, të miratuar pas Marrëveshjes së Ohrit, në të cilën bartës i sovranitetit në Maqedoninë e Veriut janë: 1. Qytetarët e Republikës së Maqedonisë; 2. Populli maqedonas; dhe 3. Pakicat kombëtare (pjesa e popullit shqiptar, turk, vlleh….).

Kjo e bën Maqedoninë e Veriut shtet monoetnik, që e njeh ekzistencën e pakicave, por ku bartës i sovranitetit është kombi maqedonas, ndërsa shqiptarët janë të parët në kolonën e minoriteteve (pakicave).

Këtë preambulë e ka pranuar Ali Ahmeti duke qenë ende si komandant i UÇK-së. Se pse ka lejuar që një popull që është së paku 1/4 e këtij shteti (pra, shqiptarët) të trajtohet si pakicë, këtë duhet ta shpjegojë ai. Por, e rëndësishme është se definimi i shqiptarëve si minoritet (pakicë) në preambulë të kushtetutës, ka bërë që gjuha shqipe të mbetet në rang të gjuhës së pakicave dhe ashtu të trajtohet edhe në konventat ndërkombëtare.

Prandaj, në amendamentin për gjuhët, së pari thuhet se maqedonishtja është gjuha e shtetit, gjuha në të cilën flet shteti, ndërsa gjuhët e pakicave (aty quhen “gjuhë që e flasin së paku 20% e qytetarëve”) bëhen zyrtare varësisht nga përqindja e popullsisë. Që këtu, pastaj kemi ligj për përdorim të gjuhës maqedonase, që e sanksionon se shteti flet vetëm në maqedonisht, dhe kemi ligj për përdorimin e gjuhëve (askund nuk përmendet shqipja), që e përcakton se ku përdoren gjuhët e qytetarëve që janë mi 20%.

Ndërkaq, në realitet, e dimë se asnjë dokument në këtë shtet nuk mund të bëhet vetëm në gjuhën shqipe, pra as në komunat me 100% shqiptarë, sepse shqipja është gjuhë në të cilën dokumentet përkthehen, por nuk krijohen. Rrjedhimisht, shqipja është gjuhë e përkthyer. Prandaj, asnjë institucion nuk arkivon dokumente në gjuhën shqipe pa qenë në të teksti në maqedonisht. Kjo është gjendja e gjuhës shqipe në RMV.

Se pse e ka lejuar këtë partia Soravia, këtë e dinë ata, porse të dalin sot e të çirren se u dhimbset gjuha shqipe ose të mashtrojnë se shqipja është zyrtare, kjo nuk është vetëm mashtrim e hipokrizi, por edhe injorancë dashakeqe.

Sidoqoftë, sot në Prishtinë kryeministri i Kosovës ua përplasi se “mbreti është lakuriq”, se shqipja nuk është zyrtare në RMV, duke i përgënjeshtruar mashtrimet e tyre, që – në shoqëri demokratike – do të duhej ta ngrinin debatin se pse kanë mashtruar, si kanë mashtruar dhe si quhen ata që mashtrojnë?!

Mbetet detyrë e jona që ta kthejmë debatin serioz për zyrtarizimin e plotë të gjuhës shqipe”, tha Ibrahimi.