Droga nga Brazili për në Maqedoni, flet drejtori i kompanisë në Shkup

Të tjera detaje dalin në dritë nga kokaina e sekuestruar mbrëmjen e kaluar në Portin e Durrësit, e cila ishte e fshehur në një kontenier të ngarkuar me mish pule, që ishte nisur tranzit nga Brazili, për llogari të një subjekti tregtar në Maqedoninë e Veriut.

Ngarkesa me mish pule kishte si destinacion “Apetit Group” në Maqedoninë e Veriut, me administrator Arben Ferizin nga Kosova.

Siç mëson “BW”, kjo kompani operon prej vitesh në treg edhe në Kosovë.

Ndërkohë administratori i kompanisë “Apetit Group”, Arben Ferizi, që ka porositur mish pule nga Brazili, në kontejnerin e të cilit u zbulua dhe sekuestrua 45.5 kg kokainë në Portin e Durrësit, ka dhënë dëshminë e tij para autoriteteve.

Në dëshminë e tij, administratori kosovar nuk ka pranuar se ka dijeni për ngarkesën e drogës dhe se nuk ishte në dijeni se çfarë tjetër ndodhej në kontejner.

Sipas Ferizit, kompania e tij e salsiçeve është e suksesshme dhe se porosia dhe blerja e mishit kryet online.

“Kompania që administroj ka vite që merret me prodhimin e salçiçeve dhe është e suksesshme dhe nuk ka nevojë të implikohet në trafikimin e drogës. Ne si kompani nuk kemi asnjë lidhje dhe nuk kemi dijeni për praninë e lëndës narkotike në kontejner. Të gjitha veprimet kryhen online, porosia dhe blerja e mishit”, ka thënë administratori para hetuesve.

“Apetit Group” në Kosovë ndodhet në Vushtri. Ndërsa në vitin 2019, në këtë kompani ka ndodhur një vrasje, kanë raportuar mediat e Kosovës. Asokohe është vrarë Armend Kutllovci, ish-punonjës, që punonte prej vitesh në atë kompani.

Armendi u qëllua me një pistoletë të tipit TT-7.62 mm nga një koleg i tij, nga fshati Kukë i komunës së Dragashit.