Çfarë ushqimi po hamë? Grumbulloi mish pa afat dhe e bëri suxhuk, arrestohet

Policia ka arrestuar një person në fshatin Sigë të Pejës për prodhim dhe vënie në qarkullim të artikujve të dëmshëm ushqimor.

Policia ka thënë se i dyshuari ka grumbulluar mish pa afat dhe i ka përpunuar duke i bërë suxhuk në fabrikë.

“Njësitet e DHKEK-së kanë arrestuar të dyshuarin mashkull kosovar, nën dyshimin se i njëjti ka kryer veprën e cekur, duke grumbulluar produktet e mishit me afat të skaduar dhe pastaj të njëjtat i ka përpunuar duke përfunduar si suxhuk”, thuhet në raportin e PK-së.

Gjatë bastisjes, njësitet policore në bashkëpunim edhe me AUV-në, në fabrikën për përpunimin e mishit kanë gjetur e konfiskuar produkte mishi gjysmë të përpunuar, pa origjinë, pa deklaracion, pa datë prodhimi e skadimi.

“Me vendim të inspektorëve të AUV-it, malli është asgjësuar, ndërsa i dyshuari pas intervistimit me urdhër të prokurorit është dërguar në mbajtje. Rasti duke u hetuar”.