BDI jashtë qeverisë – vijë e kuqe edhe e ZNAM edhe e VLEN!

Dy subjektet opozitare deklaruan se do të ulen me kërkesat e tyre në takim me liderin e VMRO-DPMNE-së, nëse ai do të jetë mandatar për negociata për qeverinë e re, edhe pse Mickoski deklaroi se ka nisur bisedimet me partitë opozitare që janë pjesë e koalicionit “VLEN”, shkruan PRESSonline.al

Lideri i opozitës VMRO-DPMNE, Hristijan Mickoski, ndoshta do të duhet të presë natën e 8 majit, pas numërimit të votave nga zgjedhjet presidenciale dhe parlamentare, për përgjigje konkrete nga ZNAM dhe “VLEN” nëse do të jenë pjesë e kabinetit të ri qeveritar nëse partia opozitare fiton zgjedhjet.

Edhe ZNAM edhe “VLEN” deklaruan se do të presin të numërohen mandatet e deputetëve dhe pastaj me kushtet dhe vijat e tyre të kuqe do të ulen me Mickoskin nëse ai është mandatar për negociatat për qeverinë e re, ndonëse lideri i VMRO-DPMNE deklaroi se ka filluar bisedimet me partitë opozitare që janë pjesë e koalicionit “VLEN”.

As ZNAM nuk konfirmon se po negociojnë për një koalicion qeveritar. Përkundrazi, thonë se bisedimet për pjesëmarrje të mundshme në qeveri do të zhvillohen pas zgjedhjeve parlamentare.

“Që nga mëngjesi kam marrë iniciativën, kam biseduar me disa nga aktorët politikë, për momentin do të doja që të mos i zbulojmë emrat, edhe pse ata vetë do të njihen në opinion këto ditë, për t’i përmbyllur të gjithë ato biseda dhe negociata. Mendoj se potenciali është i madh, të gjitha ato parti politike antiqeveritare janë të mirëseardhura, e kam fjalën për të gjitha partitë që janë në opozitë e Qeverisë së LSDM-së dhe BDI-së. Mendoj se fillimisht do të bëjmë një rezultat të mirë, të shkëlqyeshëm, historik, e më pas do të bëjmë një qeveri solide, stabile që do të sjellë transformimin e Maqedonisë”- tha Mickoski, përcjell PRESSonline.al

Minçev: Deri më tani nuk ka pasur negociata me asnjë palë

E ndërsa lideri i opozitës po nxiton me negociatat për një qeveri të re, përshtypja nuk është e tillë sipas postimit të një prej drejtuesve të “VLEN”, Arben Taravari dhe deklaratës së kreut të Shtabit Qendror Zgjedhor të ZNAM, Goran Minçev të dhënë për “Sloboden Peçat”.

“Deri më tani nuk ka pasur negociata me asnjë parti, sepse ne nuk kemi hyrë në skenën politike për të bërë pazare për pozicione, por për të treguar se është e mundur me një qasje të ndershme dhe të sinqertë, dhe duke vepruar kështu dëshmuam se një forcë e re politike lindi, e cila bazuar në një matricë ideologjike dhe në drejtimet e veta programore që do t’u ofrojë të gjitha palëve, do të negociojë për një qeveri të mundshme koalicioni në të ardhmen. Kryetari i partisë deri më tani ka deklaruar disa qëndrime që janë në programin “Manifesti për Maqedoninë”, me të cilin do të bëjmë thirrje për bashkim kombëtar, gjegjësisht një deklaratë në të cilën do të interpretohen dhe përvijohen vijat e kuqe maqedonase dhe interesi kombëtar i Republikës së Maqedonisë, me të cilat do të përcaktohen qëndrimet e Maqedonisë për hyrje në BE. Sigurisht që do të kemi edhe kushte politike. Një nga kushtet politike do të jetë që BDI të mos jetë pjesë e qeverisë së re – zbulon Minçev, përcjell PRESSonline.al

Ai shton se partitë që kanë ekzistuar për një kohë të gjatë dhe që kanë dominuar pushtetin për 30 vitet e fundit e kuptojnë programin dhe ideologjinë e tyre dhe kopjojnë pikëpamjet e tyre politike. Minçev thotë se ZNAM në zgjedhje dëshmoi se në skenën politike populli e njohu vizionin dhe programin e tyre dhe se u vendos si faktor serioz politik pa të cilin nuk do të ishte e mundur qeverisja.

– Ne u zyrtarizuam si parti, u faktorizuam në zgjedhjet presidenciale dhe do të favorizojmë njëri-tjetrin në zgjedhjet parlamentare. Nuk e përjashtojmë mundësinë e qëndrimit në opozitë. Nuk do të ulemi me asnjë parti për të biseduar para se të dalin rezultatet e zgjedhjeve parlamentare, është i vendosur Minçev.

Gashi: Nuk ka se si të ketë qeveri pa “VLEN”-in

Pas fitores së Gordana Siljanovska-Davkovës në raundin e parë, Mickoski bëri të ditur se e ka telefonuar kandidatin për president të “VLEN”-it, Arben Taravari për ta uruar për rezultatin dhe bashkëpunimin e mundshëm në qeverinë e re, ndërsa Taravari i është përgjigjur liderit të VMRO-së përmes Facebook-ut. Sipas Taravarit, propozimi i Mickoskit tregon se edhe VMRO-DPMNE e ka kuptuar se ku peshon vota e shqiptarëve. Megjithatë, ai thotë se VLEN-i tani do të fokusohet në zgjedhjet e 8 majit për të siguruar sa më shumë mandate.

“Propozimi i Mickoskit tregon se edhe VMRO-DPMNE e ka kuptuar se ku qëndron pesha e votës dhe e deputetëve shqiptarë. Por, fokusi ynë si koalicion dhe si parti është puna për zgjedhjet e 8 majit për numrin më të madh të mandateve. Pas zgjedhjeve do të udhëhiqemi nga interesi kombëtar i shqiptarëve. “VLEN”-i është më e unifikuar se kurrë. Vota jonë është shumica e votave të shqiptarëve. Mandatet tona shkojnë për deputetët shqiptarë, sepse ne mbrojmë dhe promovojmë shqiptarët, nuk i shesim e as i blejmë”, ka shkruar Taravari, përcjell PRESSonline.al

Interesante është deklarata e kreut të Alternativës, Afrim Gashi, pjesë e koalicionit “VLEN”, dhënë për “A2CNN”, në të cilën ai thotë se është i bindur se shumica e shqiptarëve duan ndryshime dhe se rezultati i zgjedhjeve presidenciale do t’i motivojë më shumë dhe ai është i bindur se do të jenë fitues në bllokun shqiptar.

“Për sa i përket legjitimitetit, “VLEN” do të duhet të jetë pjesë e qeverisë dhe nuk ka se si të ketë qeveri pa “VLEN”-in, sepse do të konsiderohej se zëri shqiptar nuk ka legjitimitet” – konsideron Gashi.(PRESSonline.al)