Banka Popullore-FMN: Denari është stabil, inflacioni nën kontroll

Guvernatorja e Bankës Popullore, Anita Angellovska-Bejoska, zëvendësministri i Financave, Filip Nikolloski dhe zëvendësguvernatori Fadil Bajrami janë pjesë e delegacionit të Maqedonisë së Veriut në takimet pranverore të FMN-së dhe Bankës Botërore. Në takim me zëvendësdrejtorin e përgjithshëm të Fondit Monetar Ndërkombëtar, Bo Li, ai tha se Banka Popullore po zbaton politika të duhura, të cilat kontribuojnë në stabilizimin e inflacionit, kursit të denarit dhe ruajtjen e stabilitetit të sektorit bankar, transmeton Portalb.mk.

Në të njëjtën kohë, përfaqësuesi i lartë i FMN-së tregoi nevojën për kujdes të mëtejshëm në sjelljen e politikave, duke pasur parasysh kontekstin e pasigurt global, ku inflacioni po ngadalësohet, por më ngadalë, ndërkohë që ritmet e rritjes globale janë nën mesataren historike.

Në kuadër të Takimeve të pranverës, delegacioni zhvilloi takim me Drejtorin e FMN-së për Evropën, Alfred Kamer, i cili vuri në dukje prirjen rënëse të inflacionit, lëvizjet pozitive të rezervave valutore dhe stabilitetin e sistemit bankar.

Guvernatorja Angellovska–Bejoska theksoi se përkundër disa goditjeve, stabiliteti makroekonomik është ruajtur përmes masave të shumta monetare dhe makroprudenciale. Megjithatë, rreziqet ekzistojnë dhe kërkohet qasje e kujdesshme.