A do të “kapen” për fyti BDI dhe VLEN më 6 maj në Sheshin e Tetovës?

Bajrami thotë se Fronti Europian nuk heq dorë: Do ta mbajmë tubimin më 6 maj në Tetovë!

Për besë unë tash kuptoj që kanë ata, tha mes tjerash Naim Bajrami nga Fronti Europian për pyetjen nëse do ta mbajnë tubimin më 6 maj në Tetovë, për ku edhe VLEN ka paralajmëruar tubim në të njëjtën kohë dhe në të njëjtën datë. Bajrami tha e nuk heqin datë nga ky tubim.

“Sigurisht që do ta mbajmë, plani është që ta mbajmë.do ta mbajmë. Nëse nuk ndryshon diçka brenda kohës, por për arsye teknike mund të ndryshojë, jo për arsye tjera. Mendoj që plani është që ta mbajmë dhe ato që merren me organizime brenda Frontit Europian janë dakord që të mbahet me 6 maj në Tetovë, në sheshin Iliria”, theksoi Bajrami.

VLEN: Tubimi qendror më 6 maj në Tetovë është caktuar në mënyrë ligjore, Artan Grubi të mos shpërndajë informacione të rrejshme

Paralajmërimi për tubimin përmbyllës për një ditë në Tetovë, ka shkaktuar përplasje në mes Frontit Europian dhe VLEN-it. Këta të fundit sot në një kumtesë për media thonë se Artan Grubi po shpërndan informacione të rrejshme me qëllim për të mashtruar opinion dhe për të hedhur pluhur syve ndaj qytetarëve shqiptarë.

Nga VLEN thonë se ata do ta mbajnë tubimin qendror më 6 maj në sheshin “Iliria” në Tetovë.

“Siç po duket BDI nuk mund të pajtohet me realitetin se vendi nuk mund të funksionojë sipas dëshirave personale të Artan Grubit dhe si ja do qejfi Ali Ahmetit, por se shteti funksionon sipas ligjit”.

“Andaj ju njoftojmë se Koalicioni VLEN do të mbajë tubimin e tij qëndror më 6 maj në Sheshin Iliria në Tetovë. Kjo është caktuar në formë ligjore duke bërë fillimisht kërkesë deri tek Komuna e Tetovës, e cila më datë 18 prill ka dhënë pëlqimin e saj që VLEN të mbajë tubimin e saj në sheshin e Tetovës. Këtë e dëshmojmë me dokumentin e pëlqimit të dhënë nga ana e Komunës së Tetovës. Po ashtu, sipas të gjitha normave juridike, në kohë është informuar edhe Sektori i Punëve të Brendshme në Tetovë. Fronti i BDI-së duhet ta dijë se institucionet shtetërore nuk janë pronë private e Artan Grubit e Ali Ahmetit që ata të shfrytëzohen sipas dëshirës së tyre e për interesat e tyre personale. Por ka rregulla dhe ligje se si mund të veprohet në të. E as Tetovën nuk e kanë pronë të Babës, por Tetova është pronë e qytetarëve dhe funksionon sipas ligjeve”.

“Andaj bëjmë me dije se njoftimet të cilat “Fronti Europian” i shpërndan nëpër rrjete sociale dhe nëpër pres konferenca janë veprim i drejtpërdrejtë i Artan Grubi në koordinim me Ali Ahmetin. Për çka dyshojmë se këto veprime të partisë së Ahmetit mund të kenë edhe për qëllim nxitjen dhe shkaktimin e incidenteve fizike mes qytetarëve shqiptarë. Këtë nuk do ta lejojmë dhe kërkojmë nga qytetarët që të mos bien prehë e këtyre mashtrimeve dhe provokimeve, ndërsa nga institucionet kompetente kërkojmë që të merren masa në kohë për të parandaluar çdo skenar fatkeq të planifikuar nga Artan Grubi!”, thonë nga VLEN.

Dje reagoi edhe Fronti Europian, prej ku paralajmërimin për tubimin qendror në Tetovë nga VLEN, e quajtën provokim dhe kërkuan që të tërhiqen.