Ish presidenti Meta: Fitorja e pritshme e VMRO-DPMNE-së do t’i japë një dimension të ri zhvillimit ekonomik të Maqedonisë

Ilir Meta, ish kryeministër i Shqipërisë, ministër i jashtëm, kryeparlamentar dhe president i shtetiit ka shprehur përkrahje direkte për VMRO-DPMNE-në, në prag të zgjedhjeve presidenciale dhe parlamentare.

“Fitorja e pritshme e VMRO-DPMNE në zgjedhjet e afërta do t’i japë një dimension të ri zhvillimit ekonomik të Maqedonisë së Veriut në të ardhmen nga i cili do të përfitojnë të gjithë qytetarët e saj. Të mos harrojmë se vizioni dhe politikat e saj në qeverisje e shndërruan Maqedoninë e Veriut, vendin e 10-të në botë dhe të 5-të në Europë për klimën e biznesit dhe investimet e huaja”, ka shkruar Meta në Facebook.

Sipas ish presidentit Meta, falë vizionit të VMRO-DPMNE, Maqedonia e Veriut shpërtheu për rritjen e bujqësisë dhe blegtorisë duke e nisur me 10 milionë euro financim në vit e duke e çuar në 200 milionë euro.

“Ekipi i ri i VMRO-DPMNE besoj se ka mësuar mjaftueshëm nga gabimet e bëra në të kaluarën dhe pasojat e nepotizmit, të cilat eklipsuan arritjet e jashtëzakonshme ekonomike dhe sociale”, theksoi Meta, duke shtuar se Maqedonia e Veriut do të vazhdojë të ecë e sigurt në rrugën euro-atlantike dhe përsëri shqiptarët do të jenë garancia kyçe për këtë!