Lutuni për Çanakalanë dhe Greqinë, zjarret po bëjnë kërdi

Ministri turk i Punëve të Brendshme, Ali Yerlikaya, ka bërë të ditur se përpjekjet për të luftuar një zjarr të furishëm në perëndim të Türkiyes janë duke vazhduar, raporton Anadolu.

“Përpjekjet për shuarjen e zjarrit në Çanakkale vazhdojnë pa ndërprerje”, tha Yerlikaya.

Ministri turk njoftoi se mbi 2.600 zjarrfikës dhe punonjës të shpëtimit, tetë aeroplanë, 26 helikopterë, 240 kamionë spërkatës, 71 cisterna uji, si dhe 328 automjete dhe pajisje janë dërguar në vendngjarje.

Yerlikaya tha se deri më tani 337 familje dhe 1.251 individë në nëntë fshatra në rajonin e prekur nga zjarri janë evakuuar.

Ngushtica e Çanakkalasë u mbyll për kalimin e anijeve veri-jug për shkak të zjarrit që shpërtheu dje herët, i cili u përhap me shpejtësi për shkak të erërave të forta.

Detaje të rënda dje kanë ardhur edhe nga Greqia, pas gjetjes së 18 trupave që ishin djegur nga zjarret në një pyll.

Mësohet se dy prej viktimave ishin fëmijë, teksa të jgithë viktimat raportohen të jenë meshkuj. Pavlos Pavlidis, mjek në qytetin e Alexandroupoli, kreu një inspektim fillestar në vendin ku u gjetën mbetjet e djegura, në jug të fshatit Avantas.

“Ishin gjithsej 18 trupa të djegur, të gjithë meshkuj dhe dy prej tyre ishin fëmijë. Ata u gjetën të gjithë në grupe prej dy ose tre personash në një distancë prej 500 metrash, me sa duket duke u përpjekur të arratiseshin, dhe disa prej tyre u dogjën në një barakë”- tha ai.

18 trupat u gjetën në një zonë rurale në Evros, ku zjarret po digjen jashtë kontrollit për të katërtën ditë radhazi. Të vdekurit ishin emigrantë, sipas ministrit të Migracionit Dimitris Keridis.

Pavlidis shtoi se trupat do të dërgohen në spital të mërkurën për ekzaminim nga mjekët ligjor. Ai nuk ishte në gjendje të konfirmonte raportimet se tetë trupa të tjerë u gjetën të djegur në një vend tjetër.

Rajoni i Evros është një rrugë tepër e përdorur për emigrantët që vijnë nga Lindja e Mesme dhe Azia, duke kaluar lumin nga Turqia për në Bashkimin Evropian. Autoritetet kanë raportuar një rritje në kalimeve këtë muaj.