Ushtria e Kosovës marshoi në Mitrovicë, alaramohen serbët (Video)

(Foto Arkiv)
215 ushtarë të Republikës së Kosovës kanë marshuar në jug të Mitrovicës nga kazerma “Minatori” deri në fshatin Frashër, duke u kthyer sërish në bazë.

Gjatë ditë në rrjetin social, Twitter, kanë qarkulluar video nga marshimi i ushtarëve me shkrimet se gjoja ushtria e Kosovës po shkon në veri.

Por, ministri i Mbrojtjes, Armend Mehaj, ka sqaruar se ky ka qenë marshim kondicional të cilin e ka zhvilluar regjimenti i tretë. Ai ka theksuar qartë se marshime të tilla janë të rregullta.

“Marshime të tilla janë të rregullta, ky ushtrim gjithashtu ka qenë në kuadër të planit vjetor dhe është realizuar sot, prandaj bëjmë apel tek të gjithë që aktiviteteve të tilla mos t’iu jipet konotacion tjetër. Marshimi nuk ka të bëjë asgjë me situatën e sigurisë në veri të Republikës”, ka deklaruar Mehaj.

Tutje ka sqaruar se përgjegjësinë për sigurinë e qytetarëve e ka Policia e Kosovës, teksa ka lutur që “të mos iu besoni dezinformatave dhe lajmeve të rreme”.