Miku i madh i shqiptarëve Xho Diogardi dënoi sulmin ndaj Sali Berishës

Nuk kanë të ndalur reagimet që dënojnë sulmin ndaj liderit të PD-së, Sali Berisha, e që për një pjesë të madhe të opinionit mbarë shqiptar konsiderohet si sulm i orkestruar nga PS dhe kryeministri Edi Rama.

Përveç brenda Shqipërisë, sulmi dënohet edhe nga jashtë. Këtyre akteve të dënimit i është bashkangjitur edhe miku i madh i shqiptarëve nga Amerika, ish kongresmeni Xho DioGuardi, që konsiderohet si njeriu që solli vëmendjen e SHBA-së në Ballkan në fillim të viteve 90-ta të shekullit të kaluar, me çka u vendos në lëvizje Shtëpia e Bardhë, State Departamenti, Senati, Kongresi e më vonë edhe Pentagoni, për t’i dhënë fund krimeve dhe mizorisë serbe ndaj shqiptarëve.

Reagimin e ish kongresmenit DioGuardi kundër sulmit ndaj Dr. Berishës, e sjell veprimtari i shquar shqiptar në Nju Jork e Uashington, Ylber Pilku.
“Më vjen mirë që sulmin kundër Dr. Sali Berishës e paska dënuar miku i madh i shqiptarëve, ish kongresmeni Joe Diogardi, njeriu që dha kontribut të jashtëzakonshëm në rrëzimin e Millosheviqit!”, ka shkruar Pilku në postimin e tij në Twiter.

Lidhur me situatën e fundit në Shqipëri, përfshi edhe sulmin ndaj liderit opozitar Berisha, me një artikull është paraqitur edhe gazeta më e madhe gjermane Bild.
Në një artikull të gjatë, Bild vlerëson se Shqipëria për momentin konsiderohet një shtet mafioz dhe narko-shtet, që dëshiron të anëtarësohet në BE.

“Shqipëria është një nga vendet me problemet më të mëdha në Europë. Tani regjistrohet edhe një tjetër skandal i rëndë!

Vendi ballkanik konsiderohet një shtet mafioz dhe narko-shtet, dhe dëshiron të anëtarësohet në BE. Sipas koalicionit qeverisës në Gjermani, kjo gjë duhet lejuar”, shkruan Bild.

Samiti i djeshëm i Ballkanit Perëndimor në kryeqytetin shqiptar të Tiranës, trajtoi anëtarësimin në BE të shteteve si Shqipëria, Kosova, Maqedonia e Veriut dhe Serbia. I pranishëm gjithashtu ishte edhe kancelari Olaf Scholz, 64-vjeçari i Socialdemokratëve.

Dhunë mbi liderin e opozitës

Kreu i opozitës shqiptare, Sali Berisha, 78-vjeçari i Partisë Demokratike, drejtoi një demonstratë në vendin e takimit. Papritur dhe në mënyrë të befasishme, presidenti i parë i zgjedhur lirisht në Shqipëri, u sulmua nga një bandit dhe u godit në fytyrë. Menjëherë truprojat reaguan ndaj agresorit duke e goditur. Berisha pësoi një mavijosje në fytyrë dhe ishte dukshëm i befasuar nga sulmi.

Demonstrata, tha Berisha për BILD vonë në mbrëmje, ishte e drejtuar kundër qeverisë së kryeministrit Edi Rama dhe bëri thirrje për një perspektivë të vërtetë dhe të ndershme evropiane për Shqipërinë.

Për BILD, Berisha tha: “Nuk ishte vetëm një sulm ndaj meje, por ndaj gjithë opozitës në Shqipëri. Vështirë se mund të jetë rastësi që të dërgohet një bandit kundër meje, ndërsa kancelari gjerman po takohej me kreun e qeverisë sonë mafioze në Tiranë. Është koha që BE të kuptojë sa i rrezikshëm është Edi Rama”. Berisha më herët pretendoi se agresori ishte një informator i njohur i policisë kriminale.

Për vite me radhë, Berisha, i cili e udhëhoqi vendin e tij nga komunizmi shqiptar i epokës së gurit në vitin 1990 dhe u bë presidenti i parë jokomunist i vendit në vitin 1992, ka pasur përplasje me socialistin Rama. Në Shqipëri ka vazhdimisht protesta të dhunshme.

Politikanët janë armiq prej vitesh

Berisha dhe Rama vazhdojnë të akuzojnë njëri-tjetrin për korrupsion. Berisha e konsideron Ramën përgjegjës, ndër të tjera, për faktin se Shqipëria tashmë konsiderohet një nga qendrat më të rëndësishme të trafikut të drogës në Europë. Përveç kësaj, Berisha akuzon Ramën se socialistët blejnë vota në zgjedhje me ndihmën e mafies. Rama, i cili ka kontakte të ngushta edhe me deputetë të rinj të CDU-së në Gjermani, e mohon këtë.

Rama e zëvendësoi Berishën si kryeministër në vitin 2013, pasi ai mbante postin e kryeministrit që nga viti 2005. Deri në vitin 2013, ai kishte qenë në krye të Partisë Demokratike konservatore.

Pas një disfate elektorale nga socialistët e Ramës, Berisha dha dorëheqjen nga drejtimi i partisë. Në maj të këtij viti ai u rikthye në drejtimin e partisë, pasi rrëzoi pasaardhësin e tij dhe nxënësin politike, Lulzim Basha. Basha konsiderohej nga Berisha dhe të tjerë demokratë me ndikim se ishte shumë pro-qeveritar.

Berisha vazhdon të akuzojë Ramën se ai ka ndikuar që ai të jetë në listën e zezë të SHBA.

Organizata për Sigurinë dhe Bashkëpunimin në Europë- OSBE, vërteton vazhdimisht se Shqipëria ka probleme serioze në zgjedhje, në luftën kundër korrupsionit dhe demokratizimin. Ekspertët kryesorë të Ballkanit, si shefi i politikës së jashtme për një kohë të gjatë në Parlamentin Europian, Elmar Brok i CDU, kanë paralajmëruar prej vitesh kundër anëtarësimit të plotë të Shqipërisë në BE.