Ish presidenti kroat Mesiq i gatshëm ta ndihmojë Kosovën kundër Serbisë
Ish-presidenti i Kroacisë, Stipe Mesiq, ka thënë se Kosova duhet të ketë angazhim të shtuar në rrafshin ndërkombëtar, pasi që, sipas tij, Serbia është duke vazhduar me fushatat lobuese për çnjohje të Kosovës.
Alarmi i tij u ngrit në një takim që pati të shtunën në mesditë me kryeministrin e Kosovës, Albin Kurti, bashkë me ish-presidentin e Shqipërisë, Bamir Topi.
Sipas njoftimit nga Zyra e Kryeministrit, Topi ka theksuar nevojën për bashkëpunim më të madh rajonal e koordinim më të mirë mes Kosovës dhe Shqipërisë, sidomos me institucionet e Bashkimit Evropian, përfshirë edhe çështjen e liberalizimit të vizave.
Ndërkaq, Kurti që i ka falënderuar dy ish-liderët për përkrahjen për Kosovën, ka thënë se dialogu me Serbinë duhet të ketë në qendër njohjen e ndërsjellë.
Fushata e Serbisë kundër Kosovës është parë edhe në takimet e fundit që ministri i Jashtëm serb, Nikola Selakoviq, po i zhvillon në Afrikën qendrore. Në disa shtete ai ka shprehur falënderimin për përkrahjen për “ruajtjen e integritetit territorial dhe sovranitetit të Serbisë” për çështjen e Kosovës.
Kosova e Serbia në shtator të vitit 2020 ishin zotuar për memorandum njëvjeçar, me Kosovën që të ndalte përpjekjet për pranime në organizata ndërkombëtare, e Serbinë që të ndalte fushatën e çnjohjeve. SHBA-ja, si vend ku u nënshkrua marrëveshja, u ka kërkuar dy shteteve vazhdim të memorandumit.
