Për ditën e zjarrfikësve, 20 maj, Brigada e Zjarrfikësve të Shkupit mori edhe një premtim për paga më të larta dhe uniforma të reja, pothuajse njësoj si në të gjitha festimet e viteve të kaluara. Kryetarja e Shkupit, Danela Arsovska, u ka premtuar zjarrfikësve se do të kërkojë nga qeveria e re që të ndryshojë rregulloret që kufizojnë pagën e zjarrfikësve.
“Së pari, zjarrfikësit tanë duhet të kenë një ndryshim në kushtet në të cilat mund të paguhen. Fondet e kufizuara që marrin si kompensim për punën e tyre janë vërtet të ulëta. Këtë e përcakton ligji dhe për fat të keq, ne si pushtet vendor nuk mund të shkojmë përtej asaj që përcakton kuadri ligjor, qoftë edhe me kontratë kolektive. Ndaj apeli është që kushtet që kufizojnë pikët e tyre janë ndër gjërat e para që hiqen nga rregullorja e re.”, – deklaroi kryetarja e qytetit të Shkupit, Danela Arsovska.
Komandanti i njësisë së zjarrfikësve thotë se fat të keq kemi 180 zjarrfikës nga 384 të planifikuara.
“Njësia momentalisht numëron 180 zjarrfikës. Kemi numër të lartë të kolegëve që kanë dalë në pension. Kemi mungesë të të punësuarve, por shpresojmë që pas përbërjes së qeverisë së re të mundemi të punësojmë njerëz adekuat dhe të përshtatshëm për punë.”, – theksoi komandanti në Brigadën e zjarrfikësve, Zvonko Tomevski.
Zjarrfikësit që u dalluan vitin e kaluar morën mirënjohje dhe falënderime, ndërsa zgjedhjen, siç sqaroi kryetarja Arsovska, e kanë bërë vetë zjarrfikësit.
