Policia gjuan pas dilerit të drogës në Veri, goditi policin me veturë dhe iku

Një person, i dyshuar për narkotikë, ka refuzuar të ndalej në kontroll nga Policia e Kosovës në Suhodoll në Mitrovicë të Veriut dhe teksa ka bërë përpjekje të ikte, ka goditur me veturë një polic dhe veturën e Policisë, ka bërë të ditur zëvendësdrejtori i Policisë në veri, Veton Elshani.

Elshani ka konfirmuar se policia është detyruar të shtinte me armë. Nga të shtënat nuk ka pasur të lënduar.

I dyshuari ka lënë veturën në vend të ngjarjes dhe ka ikur në këmbë, ka thënë Elshani.

“Kemi informacione për të dyshuarin dhe besojmë se kemi të bëjmë me rast me marihuanë. Policia është në vend të ngjarjes dhe po merret me rastin”, ka thënë ai.