Parlamenti hungarez shtyu ratifikimin e Suedisë në NATO

Parlamenti i Hungarisë nuk do të votojë për ofertën e Suedisë për anëtarësim në NATO në seancën e javës së ardhshme, sipas agjendës së publikuar sot.

Suedia, e cila braktisi një politikë të gjatë të mos-angazhimit ushtarak pas pushtimit rus të Ukrainës, kishte shpresuar të bashkohej zyrtarisht me aleancën në një samit të NATO-s më 11-12 korrik.

Edhe pse ka mbështetje të fortë nga anëtarët e tjerë, si Shtetet e Bashkuara, Turqia e Hungaria deri më tani kanë bllokuar ratifikimin e anëtarësimit të saj, transmeton Telegrafi.

Ligjvënësi i Koalicionit Demokratik të opozitës, Agnes Vadai i tha Reuters se përfaqësuesit e partive qeverisëse Fidesz dhe Demokristiane, nuk mbështetën një propozim për ta vendosur çështjen në rendin e ditës të seancës plenare të parlamentit të javës së ardhshme në një takim komiteti.

“Komisioni parlamentar ka refuzuar të vendosë votimin në rendin e ditës javën e ardhshme”, tha Vadai, duke shtuar se partia e saj do të propozojë përsëri një votim të hënën në parlament.

Vadai tha se ishte “e qartë” që Fidesz vendosi të planifikojë votimin në varësi të pozicionit të Turqisë.

“(Kryeministri) Viktor Orbán lëviz së bashku me (Presidentin turk Tayyip Erdogan) injoron sovranitetin hungarez dhe shkatërron unitetin e NATO-s”, tha ajo.

“Siç duket sot, nuk do të ketë ratifikim përpara samitit të NATO-s”, shtoi ajo.

Kryeministri suedez Ulf Kristersson tha se kishte ndërmend të fliste me Orban të enjten më vonë, pas raporteve të mediave se parlamenti i Hungarisë do të vononte ratifikimin e ofertës suedeze për NATO-n.

Një zëdhënës i qeverisë hungareze dhe ministrisë së Jashtme nuk iu përgjigj pyetjeve të dërguara me email nga Reuters.

Parlamenti hungarez do të jetë në seancë të hënën, të martën dhe të premten e ardhshme. Ata do të votojnë disa projektligje, përfshirë buxhetin e 2024-ës.

Procesi i ratifikimit ka ngecur në parlament që nga korriku i kaluar, por vetëm në shkurt Orban shprehu për herë të parë shqetësimin për aspiratat e Suedisë dhe Finlandës për anëtarësim në NATO.