Parlamenti Europian: Rusia t’i kthejë arin Rumanisë, që ia mori gjatë Luftës së Parë Botërore

Ligjvënësit në Parlamentin Evropian kanë miratuar një rezolutë jodetyruese që thotë se Rusia duhet t’i kthejë Rumanisë arin dhe sende të tjera të vlefshme të trashëgimisë që u dërguan në Moskë gjatë Luftës së Parë Botërore për ruajtje.

Gjatë asaj lufte, Rumania dërgoi me hekurudhë 91.5 tonë metrikë monedha ari dhe shufra në Moskë, së bashku me bizhuteritë dhe thesaret kulturore si vepra arti.

Ari u konfiskua, pasi bolshevikët morën pushtetin në Rusi në 1917. Rezoluta e së enjtes u propozua nga ligjvënësi rumun Eugen Tomac, me mbështetjen e Bankës Kombëtare të Rumanisë.

Tomac e përshëndeti atë si një “votim historik”, megjithëse ka pak shanse që Rumania të rimarrë në të vërtetë arin.