Osmani: NATO-ja së bashku me luftën e UÇK-së i sollën lirinë Kosovës

Presidentja e Kosovës, Vjosa Osmani, ka bërë homazhe dhe ka vendosur kurora lulesh te Pllaka Përkujtimore e ushtarëve të rënë të NATO-s, me rastin e shënimit të 22-vjetorit të çlirimit të Kosovës. Bashkë me Osmanin kanë bërë homazhe edhe kryeministri Albin Kurti dhe kryeparlamentari Glauk Konjufca.

Para gazetarëve, Osmani tha se më këtë rast po e nderojnë kontributin e jashtëzakonshëm të secilit ushtar të NATO-s që i qëndroi krah Kosovës në momentet më të errëta të saj.

Tutje, ajo tha se NATO-ja, bashkë me luftën e UÇK-së, ia solli lirinë Kosovës.

“Jemi këtu për ta nderuar vazhdimin e këtij kontributi, kontribut i cili ka vazhduar edhe më tej e vazhdon edhe sot për paqen e sigurinë në Kosovë dhe në rajonin tonë. Në listën e festave zyrtare, kjo ditë njihet si Ditë e Paqes, por në mesin e qytetarëve tanë njihet si Dita e Çlirimit dhe Dita e Lirisë”, shtoi ajo.

“Të tria këto epitete i përshtaten kësaj dite, sepse 12 qershori, hyrja e forcave të NATO-s, së bashku me luftën e UÇK-së, i sollën Republikës së Kosovës, pas një sakrifice të jashtëzakonshme mbinjerëzore, edhe lirinë, edhe çlirimin, por edhe paqen pas shumë e shumë vuajtjeve e sakrificave të popullit tonë”, deklaroi Osmani.

Ndërkohë Kurti tha se këtë ditë duhet t’ia kujtojë vetes secili qytetar i Kosovës, duke i nderuar ata që e dhanë jetën për liri.

“Në qershorin e vitit 1999, kishim zjarr në qiell dhe zjarr në tokë, por më 12 qershor, këmbësoria e NATO-s i bashkohet ndërhyrjes nga ajri kundër Jugosllavisë së Millosheviqit për ta ndaluar gjenocidin mbi popullin shqiptar. Siç e tha edhe presidentja e Republikës, më 12 qershor ne i kremtojmë paqen, çlirimin dhe lirinë dhe këtë ia përkujtojmë vetes çdo ditë, sepse të gjithë ato gra e burra që u sakrifikuan, dhanë jetën, ndodhen në themelet e institucioneve tona, të shtetit tonë, të pavarësisë sonë, të cilin duhet ta shpiejmë më tej me zhvillim, drejtësi dhe demokraci”, tha Kurti.

Edhe kryeparlamentari Glauk Konjufca tha se liria erdhi si kontribut i Ushtrisë Çlirimtare të Kosovës dhe faktorëve ndërkombëtarë që e ndihmuan luftën për t’u çliruar nga Serbia.

“Liria jonë ka ardhur si kontribut i UÇK-së, i dëshmorëve tanë, që e dhanë jetën për liri, por edhe i bashkimit, kontributit të përpjekjes sonë çlirimtare me faktorët ndërkombëtare, që e ndihmuan luftën tonë dhe ne u çliruam nga okupimi i Serbisë. Vetë fakti se aleanca më e madhe ushtarake i doli në ndihmë popullit të Kosovës, e bombardoi Serbinë për shkak të gjenocidit që ajo shtroi mbi popullin e Kosovës, kjo flet se kauza jonë ishte shumë e drejtë, liria jonë ishte shumë e shtrenjtë”, tha Konjufca./Express