Organizohet festë për Islamin, foshnjën afgane që lindi në Shkup

Gruaja afgane e cila ditë më parë kishte lindur foshnjën e saj në Klinikën e Gjinekologjisë në Shkup tashmë ka dalë nga spitali, transmeton Alsat. Ajo ka lindur një djalë me peshë 3,2kg, ndërkaq e është pagëzuar me emrin Islam.

Për nder të sapolindurit, Kryqi i Kuq ka organizuar një festë në hotelin Bellvi në Shkup. Nga ky institucion janë përgatitur 200 petulla, të cilat janë ndarë në mesin e 149 refugjatëve afganë.

“Me këtë deshëm që në mënyrë tradicionale t’i urojmë mirëseardhje foshnjës”, tha për Zërin e Amerikës, Suzana Paunovska, sekretare pranë Kryqit të Kuq në Shkup.

Nëna dhe foshnja janë në gjendje të mirë shëndetësore. Në Shkup për momentin janë të vendosur 74 gra afgane, 76 burra dhe 56 fëmijë të moshës nën 18 vjet. Sipas autoriteteve, refugjatët do të qëndrojnë në vendin tonë 90 ditë.