Ministrat e Jashtëm perëndimorë apel Koresë së Veriut, i kërkojnë të ndalojë furnizimet me armë drejt Rusisë
Dhjetë ministra të jashtëm, përfshirë sekretarin e Jashtëm britanik David Cameron, po kërkojnë që Koreja e Veriut të ndalojë furnizimet me armë drejt Rusisë.
Në fillim të këtij muaji, Rusia hodhi poshtë pretendimet se po punonte me Phenianin për çështjet ushtarake dhe tha se marrëdhënia midis vendeve nuk ishte një kërcënim për të tjerët.
Por ministrat thonë se Rusia po përdor transferimet e armëve të Koresë së Veriut “për të goditur infrastrukturën kritike të Ukrainës, duke zgjatur vuajtjet e popullit ukrainas”.
Ata gjithashtu kërkuan që Koreja e Veriut t’i japë fund programit të saj të armëve bërthamore.
Dje, Koreja e Veriut lëshoi një breshëri raketash balistike për të treguar se është e gatshme të godasë paraprakisht “regjimin e gangsterëve” të Koresë së Jugut, siç Pheniani e konsideron vendin fqinj.
Ndërkohë, disa nga zyrtarët janë në Pragë për një samit dy-ditor të NATO-s, ku ata kanë diskutuar për lejimin e Ukrainës që të përdorë armët që ata kanë furnizuar për të goditur brenda Rusisë.
