Tre apo katër deputetë të Koalicionit të Frontit Europian janë në pushtet me një këmbë, tha mbrëmë në intervistë për A2 CNN, kreu i Lëvizjes Demokratike, parti që është pjesë e koalicionit VLEN, Izet Mexhiti.
Sipas tij, BDI e ka formuar Frontin Evropian për të mbijetuar si faktor në skenën politike. Ai madje në mënyrë indirekte ka treguar kush janë 3-4 deputetët në fjalë, transmeton lideri.mk.
“Frontin Evropian nuk e bashkoi as ideologjia, as programi, por për të mbijetuar ato parti. Tani kur është e qartë se nuk do të jenë në pushtet, misioni ka dështuar dhe fillon shpërbërja e Frontit Europian. Pra, tashmë mund të them se nga ata 18 deputetë që mori ky Front, tre-katër me një këmbë janë pjesë e mazhorancës së re. Tani nuk do t’i them emrat e tyre, por atje janë dy parti turke dhe komuniteti turk nuk ka kapacitet dhe potencial për të qëndruar katër vjet në opozitë. Ata sigurisht e shohin veten në qeverinë e ardhshme. Janë edhe disa deputetë të tjerë që janë me Ahmetin, të cilët në të kaluarën kanë luftuar dhe vrarë njëri-tjetrin, duke shkaktuar viktima te shqiptarët dhe pasoja të rënda. Kurse tani për tani ende janë bashkë”, tha Mexhiti.
