Lajm i keq, ekonomia e Gjermanisë do të shkojë në minus gjatë muajve të dimrit

Gjermania po shkon në prag të recesionit dimëror pasi pengesat e furnizimit dhe një valë e rasteve të reja të coronavirusit po e pengojnë zhvillimin ekonomik.

Ekonomia më e madhe e Evropës do të tkurret 0.5 për qind në tremujorin e katërt të këtij viti, krahasuar me të tretin, dhe do të ngecë në tre muajt e parë të vitit 2022, sipas parashikimeve të publikuara të martën nga Instituti për Kërkime Ekonomike Ifo.

Një ekonomi është në recesion kur tkurret radhazi në dy tremujorë të vitit, raporton cnn.

“Problemet e vazhdueshme të furnizimit dhe vala e katërt e coronavirusit po ngadalësojnë dukshëm ekonominë gjermane”, tha në një deklaratë, Timo Wollmershauser, kreu i parashikimeve në Ifo.

“Rimëkëmbja e fortë pas pandemisë që pritej fillimisht për vitin 2022, ende nuk është materializuar”, shtoi ai, transmeton Telegrafi.

Rritja pritet të arrihet verën e ardhshme pasi vala e katërt e coronavirusit të ulet ndërsa lehtësohen pengesat me furnizime, por fillimi i ngadaltë i vitit do t’i kushtojë centralit të prodhimit.

Ifo uli parashikimin e rritjes për vitin 2022 me 1.4 për qind, gjegjësisht në 3.7 për qind.

Ifo pret që inflacioni të rritet me 3.1 për qind gjatë këtij viti dhe 3.3 për qind në vitin 2022, norma që tejkalojnë shumë objektivin e Bankës Qendrore Evropiane prej 2 për qind. Çmimet e konsumit nuk pritet të kthehen në normalitet deri në vitin 2023, sipas Ifo.

Perspektiva e zymtë vjen ndërsa vendet në mbarë botën përgatiten për një valë të mundshme të rasteve me coronavirus të shkaktuar nga varianti Omicron, i cili mund të shtojë presion në zinxhirët e furnizimit global dhe t’i detyrojë bankat qendrore të rimendojnë planet për të tërhequr mbështetjen për ekonominë.

Javën e kaluar, Gjermania regjistroi numrin e saj më të lartë të vdekjeve ditore nga COVID-19 që prej muajit shkurt, teksa luftoi për të vënë nën kontroll një valë të katërt të pandemisë.

Në fillim të këtij muaji, ajo ndaloi njerëzit e pavaksinuar të hynin në të gjitha bizneset, përveç atyre më thelbësore, si supermarketet dhe farmacitë, si pjesë e kufizimeve të reja.

Agjencia Ndërkombëtare e Energjisë paralajmëroi të martën se një rritje e rasteve do të ngadalësonte rimëkëmbjen e kërkesës globale për naftë.

Grupi uli parashikimin e kërkesës për naftë me afërsisht 100 mijë fuçi në ditë si për vitin 2021, ashtu edhe për vitin 2022, duke thënë se udhëtimi ajror dhe karburanti i aeroplanëve do të prekeshin më së shumti.

Çmimi i naftës së papërpunuar Brent, standardi global, ka rënë rreth 10 dollarë për fuçi që nga fillimi i nëntorit në nën 75 dollarë.

Megjithatë, IEA tha se goditja në ekonomi do të ishte më pak e rëndë se valët e mëparshme të virusit.

“Masat e reja të kontrollit të vendosura për të ndaluar përhapjen e virusit ka të ngjarë të kenë një ndikim më të heshtur në ekonomi kundrejt valëve të mëparshme të coronavirusit, jo më pak për shkak të fushatave të përhapura të vaksinimit”, njoftoi agjencia në raportin e saj të përmuajshëm për dhjetorin.

Ndryshe, pothuajse dy milionë punëtorëve në ekonominë më të madhe të Evropës do të kenë një rritje të madhe të pagës.