Kush është drejtori i Alternativës që po paralajmëron 3.700 punësime të reja? (Foto)
Bekim Emini, drejtor i Agjencisë për Investime të Huaja dhe Promovim të Eksportit InvestMaqedonia e Veriut ka sjellur një lajm mjaft të mirë, veçanërisht për rininë në vendin tonë dhe që mund ta ndalë ikjen e tyre jashtë vendit. Bëhet fjalë për një projekt në vlerë prej 145 milionë eurove, që do të sjellë 3.700 punësime të reja dhe mjaft të paguara.
Emini të premten njoftoi se Qeveria e Republikës së Maqedonisë së Veriut dhe
Agjencia për Investime të Huaja dhe Promovim të Eksportit InvestMaqedonia e Veriut së bashku me Кompanitë sot bashkuan forcat për një ekonomi më të mirë.
“Në seancën e sotme qeveritare, u mor vendimi për të dhënë kontrata të ndihmës shtetërore sipas ligjit për mbështetjen financiare për investimet e kompanive.
Sivjet, 280 kontrata të reja mbështetëse do të nënshkruhen me kompani që hyjnë në ciklet e investimeve prej rreth 145 milionë euro dhe do të krijojnë më shumë se 3700 vende pune gjatë 5 viteve të ardhshme ose derisa të përfundojnë kontratat e tyre.
Ndërsa vetëm në vitin 2021, këto 280 kompani investuan rreth 50 milionë euro dhe krijuan mbi 1500 vende të reja pune”, deklaroi Emini.
Ai shtoi se drejtori që e udhëheq dhe kjo Qeveri, angazhohet për të mbështetur ekonominë në drejtim të zhvillimit të ekuilibruar rajonal dhe të përshpejtuar teknologjik, futjes së inovacioneve dhe digjitalizimit të proceseve, gjë që kontribuon në produktivitet dhe konkurrueshmëri më të madhe të kompanive në tregjet e brendshme dhe ndërkombëtare.
Lidhur me këtë projekt të madh është prononcuar edhe ministri për Shoqëri Informatike, Admirim Aliti.
“3.700 vende të reja punës priten që të hapen nga përkrahja prej 145 milion eurove që po ia ofrojmë kompanive të ndryshme për t`u futur në ciklin investues”, njoftoi ministri për Shoqëri Informatike, Admirim Aliti.
Edhe ai ka theksuar se 280 kontratat që do të nënshkruhen janë garanci për kujdesin e Qeverisë ndaj biznesit që është konform dispozitave të Ligjit për përkrahje financiare.
