Kanadaja rithekson mbështetjen për anëtarësimin e Kosovës në organizata ndërkombëtare

Kryeministri Albin Kurti ka zhvilluar një takim me ambasadoren jorezidente të Kanadasë për Kosovë, Jessica Blitt.
Siç theksohet në një njoftim, Kurti ka shprehur mirënjohjen në veçanti për mbështetjen e dhënë për zhvillim, avancim të të drejtave të njeriut dhe barazisë gjinore, si dhe përkrahjen në procesin e anëtarësimit e Kosovës në organizata ndërkombëtare, përcjell lajmi.net

Kurse Blitt ka ritheksuar mbështetjen e Kanadasë për anëtarësimin e Kosovës në organizata ndërkombëtare.

“Ambasadorja Blitt, e cila është ambasadore rezidente në Zagreb të Kroacisë, falënderoi kryeministrin Kurti për mikpritjen. Ajo ritheksoi përkushtimin e vazhdueshëm të Kanadasë ndaj Republikës së Kosovës, si dhe mbështetjen në rrugëtimin e saj për integrim dhe anëtarësim në organizata ndërkombëtare”, thuhet në një komunikatë të Zyrës së Kryeministrit.