Javën e ardhshme Qeveria e re, këta persona pritet të emërohen ministra

Javën e ardhshme Qeveria e re, këta persona pritet të emërohen ministra
Java e ardhshme do të jetë javë finale për krijimin e institucioneve të reja në Kosovë. Të hënën pritet që pos konstituimit të Kuvendit të votohet edhe Qeveria e re.

Gjatë javës ndërkaq, është diskutuar mundësia që të thirret seancë edhe për presidentin. Deri më tani disa persona dihet se do të emërohen në krye të dikastereve qeveritare.

Albin Kurti e Vjosa Osmani, dyshja që fitoi bindshëm zgjedhjet e 14 shkurtit, po vazhdojnë konsultat me partitë politike edhe këtë javë, derisa tashmë LVV e Lista “GUXO”, janë në përfundim të përgatitjeve për formimin e Qeverisë së re të Kosovës.

Lexo Edhe:
Kushtet që duhet t’i plotësoj LDK-ja për rikthimin e Vjosa Osmanit
‘Kërkesat e turpshme’ të PDK-së për Kurtin e Osmanin – dëshpërimi pas humbjes së rëndë
Glauk Konjufca pritet që të emërohet në krye të Kuvendit, post ky që e kishte mbajtur edhe pas marrëveshjes së nënshkruar me Isa Mustafën në koalicionin me LDK-në.

Ai nuk e ka mohuar se është vendosur që të emërohet në këtë pozitë, derisa, vetë ka thënë se tashmë bashkë me Osmanin kanë finalizuar 80% të kabinetit qeveritar.

“Nuk i kemi bërë publike deri tash ndonëse konsideroj se mbi 80 përqind e qeverisë deri tash dihen. Publike do t’i bëjmë kur të jemi tek momenti konkret i zgjedhjes së qeverisë”, ka thënë mbrëmë Konjufca.

Pos Konjufcës që pritet të emërohet në organin më të larg të legjislativit në vend, në javën që vjen mund të thirret seanca për të votuar edhe për presidentin e ri të Kosovës, derisa, me marrëveshjen e nënshkruar mes Osmanit dhe Kurtit, LVV-ja i bie që do të propozojë Vjosa Osmanin në këtë pozitë.

Osmani e Konjufca, nuk janë të vetmit emra që tashmë gati se dihet se do të emërohen nëpër pozita të rëndësishme të shtetit.

Kurti si kryeministër në krye të diplomacisë po raportohet se do ta emërojë Donika Gërvallën, që vjen nga Lista “Guxo”.

Një post ministror nga kjo listë do ta marrë edhe një person, derisa, emrat që po diskutohen për t’u bërë ministra janë Faton Peci dhe Haxhi Avdyli.

Avdyli po diskutohet se mund të emërohet Ministër i Shëndetësisë, ani pse për këtë pozitë është propozuar edhe ish-ministri i këtij dikasteri Arben Vitia. Vitia mund të mos propozohet ministër, vetëm për faktin se në tetor të këtij viti, ai do të propozohet nga Vetëvendosje për kryetar të Prishtinës.

Në krye të Ministrisë së Drejtësisë do të kthehet Albulena Haxhiu, ndërsa si udhëheqës i Ministrisë së Punëve të Brendshme pritet të propozohet nga Kurti, Xhelal Sveçla.

Ish-nënkryetarja e Kuvendit, Arbërie Nagavci do të jetë në krye të Ministrisë së Arsimit. Nga viti 2014 deri më 2017 ajo kishte qenë drejtoreshë e Drejtorisë Komunale për Arsim në Prishtinë, derisa, gjatë legjislaturës së VI-të si deputete e Kuvendit ka qenë anëtare e Komisionit për Arsim.

Besnik Bislimi dhe Rozeta Hajdari pritet të kthehen në pozitat që kanë pasur në Ministrinë e Financave dhe të Ekonomisë.

Janë edhe disa emra tashmë ta pakonfirmuar që po përflitet se do të emërohen në Ministrinë e Kulturës, të Bujqësisë, të Infrastrukturës e Ministrisë së Mbrojtjes.

Numri i ministrive sipas edhe dakordimeve që janë bërë qysh herët nga dyshja që garoi së bashku në zgjedhje mund të mos e kalojë numrin 12-të, ndërsa në krah të Kurtit si zëvendëskryeministra do të emërohet një përfaqësues i LVV-së dhe një përfaqësues i Listës “GUXO”.

Sipas matematikave të deritanishme, që nuk janë mohuar e as konfirmuar ani pse janë diskutuar në opion, nëse numri i ministrive do të jetë 12 atëherë ndarja do të jetë si në vijim Albin Kurti – kryeministër, një zëvendëskryeministër nga Lista Guxo, një nga Lëvizja Vetëvendosje, derisa 2 ministri do t’i shkojnë Vjosa Osmanit, 2 pakicave dhe pjesa tjetër partisë së Albin Kurtit.

Gazeta Express ka pyetur në Lëvizjen Vetëvendosje se kur do të merren vesh emrat që do të propozohen për ministra.

Nga zyra për media e këtij subjekti i kanë thënë Express-it se janë në fazën e takimeve me subjekte, e sapo të caktohen personat në pozitat përkatëse do t’i njoftojnë mediat.

“Aktualisht jemi në fazën e takimit të subjekteve parlamentare, sapo të vjen koha e do të caktohen personat në pozicionet përkatëse do ta njoftojmë publikun dhe mediat”, thonë nga LVV-ja.

Albin Kurti dhe Vjosa Osmani pritet që deri të premten t’i përfundojnë takimet me partitë politike. Sot do të takohen me përfaqësuesit e goranëve, ndërsa, të premten me kreun e Lidhjes Demokratike, Lumir Abdixhikun.