Ish-kryeministri izraelit Barak: Izraeli po humbet mbështetjen publike në Perëndim

Ish-kryeministri izraelit, Ehud Barak, paralajmëroi se mbështetja e tyre po zvogëlohet, veçanërisht në vendet perëndimore, për shkak të vdekjeve të civilëve në Gaza, transmeton Anadolu.

Barak ka dhënë një intervistë për ‘Politico’ në lidhje me çështjen Izrael-Palestine.

Ehud Barak tha se retorika e zyrtarëve amerikanë ka ndryshuar ditët e fundit dhe janë shtuar thirrjet për një pauzë humanitare në konflikt.

“Ne do të duhet të pranojmë kërkesat e Amerikës brenda 2-3 javëve të ardhshme, ndoshta edhe më shpejt”, tha ish-kryeministri.

Marrëdhëniet SHBA-Izrael

Duke theksuar rolin e rëndësishëm të SHBA-së në sigurinë e Izraelit, Barak tha: “Ju mund të shihni që dritarja po mbyllet. Është e qartë se ne po shkojmë drejt fërkimit me amerikanët në lidhje me sulmin. SHBA-ja nuk mund t’i diktojë Izraelit se çfarë të bëjë. Megjithatë, as ne nuk mund t’i injorojmë ata”.

Duke vënë në dukje se Izraeli është në proces të humbjes së opinionit publik në Evropë “për shkak të vdekjeve të civilëve në Gaza dhe frikës nga shkaktimi i një lufte shumë më të madhe dhe shkatërruese në rajon”, Barak tha: “Ne po humbasim opinionin publik në Evropë dhe do të fillojmë të humbasim qeveritë në Evropë në një ose dy javë. Dhe një javë më vonë do të dalë në sipërfaqe fërkimi mes nesh dhe amerikanëve”.

Mundësia e mbështetjes për Palestinën

Barak nënvizoi se mund të vijë mbështetje globale për Palestinën në të ardhmen.

“Nuk është jashtë mundësive që të mblidhet një forcë shumëkombëshe arabe, me mbështetjen e Lidhjes Arabe dhe Këshillit të Sigurimit të Kombeve të Bashkuara, e cila do të përfshijë disa trupa simbolike nga vendet joarabe. Këto forca mund të qëndrojnë atje për tre deri në gjashtë muaj për të ndihmuar Autoritetin Palestinez të marrë kontrollin siç duhet (në Gaza)”, shtoi ai.

Duke thënë se Egjipti dhe Jordania kanë thelluar bashkëpunimin me Izraelin në “luftën kundër terrorizmit”, Barak theksoi se vendi i tij ka nënshkruar marrëveshje “normalizimi” me Bahreinin dhe Emiratet e Bashkuara Arabe dhe se kjo është e rëndësishme për vendet arabe.

Ai tha se liderët arabë duhet të jenë në gjendje t’i thonë popullit të tyre se “është hapur një faqe e re në marrëdhënie dhe se të gjitha palët po bëjnë përpjekje të sinqertë për të qetësuar konfliktet”.

Barak, megjithatë, argumentoi se nuk do të thotë se “Izraeli duhet ose mund të nxitojë për të negociuar një zgjidhje me dy shtete”.