Nëse sot do të mbahej referendum për anëtarësimin në Bashkimin Evropian, 68% e qytetarëve të Maqedonisë së Veriut do të votonin “për”, ndërsa 13% “kundër”. Këtë e tregon anketa e fundit e IRI-t e realizuar në periudhën prej 2 shkurt deri më 5 mars të këtij viti, në vendet e Ballkanit Perëndimor. 79% e të anketuarve vlerësojnë se anëtarësimi i vendit në BE është pozitiv, megjithatë 47% prej tyre kanë deklaruar se BE-ja nuk është serioze në synimin e saj për anëtarësimin e Maqedonisë së Veriut.
Anketa, e cila është realizuar në periudhën para mbajtjes së zgjedhjeve të prillit dhe majit, nxjerr në pah edhe shqetësimin e qytetarëve për drejtimin e shtetit. Madje, 78% prej 1.220 të anketuarve kanë deklaruar se shteti po shkon në drejtim të gabuar.
Shumica e qytetarëve, madje 90% theksojnë se vendi ka problem serioz me korrupsionin, ndërkaq për këtë, fajtor është politika dhe gjyqësori.
Ndër më të korruptuarit, sipas 26% e të anketuarve janë partitë politike dhe lidershipi i tyre, ndërkaq sipas 23% e të anketuarve janë përfaqësuesit e gjyqësorit.
Në pjesën e mediave, 11% e qytetarëve kanë deklaruar se janë shumë të lira, 42% disi të lira, ndërkaq 44% kanë deklaruar mendim të kundërt.
Mbi gjysma e qytetarëve të anketuar kanë deklaruar se mediat në vend janë të lira dhe të pavarura.
Sipas anketës së qytetarëve në nivel kombëtar, Alsat është vlerësuar si një ndër mediat më të besueshme për t’u informuar për çështjet politike, respektivisht televizioni i tretë pas Sitelit dhe Kanal 5. Televizion Alsat si burim të besueshëm e konsiderojnë 9 për qind e të anketuarve, Kanal 5 10 për qind ndërsa Sitelin 23 për qind. Më poshtë renditen Alfa dhe Telma. //Alsat.mk
