“Grupi i Zjarrit” nuk i pranon rezultatet e zgjedhjeve në BDI

Fraksioni i BDI-së zgjedhjet e brendshme që po i zhvillon kjo parti i cilëson si jostatutare dhe me diktat të kryetarit të kësaj partie, Ali Ahmeti. Ata thonë se ky proces është përjashtues, sepse sipas tyre, aktivistët që nuk mendojnë ndryshe kanë qenë të pamundësuar që të regjistrohen.

“Edhe pse të mbuluara me petkun e zgjedhjeve të brendshme me demokraci të lartë 1 anëtar 1 votë, duam ta informojmë opinionin e gjërë që ky proces është edhe një farsë, pasiqë kryekëput është antistatutar dhe për më tepër kryetarët veçmë janë përzgjedhur me diktat të kryetarit Ali Ahmeti kohë më parë. Rrjedhimisht kjo që po ndodh sot kinse dikush voton është vetëm një teatër i lirë për defokusim të opinionit. Ky proces assesi nuk mund të jetë demokratik sepse që në fillim ka qenë përjashtues, që don të thotë se aktivistët që nuk mendojnë që duhet të votojnë si në komunizëm, me diktat, kanë qenë të pamundësuar që të regjistrohen edhe pse janë themelues, aktiv dhe meritorë për fitoret e Bashkimit Demokratik për Integrim që nga viti 2002. Rikujtojmë, procese të ngjashme si këto, të dirigjuara, të diktuara nga lartë, janë mbajtur edhe në Pollog, por rezultati është se BDI del humbës dhe po e humb primatin tek partitë politike shqiptare, siç është rasti me Degën e Tetovës”, thuhet në reagimin e “Fraksioni i BDI-së”