Grubi: “Grupi i Zjarrit” nuk na ka dëmtuar, në anketën e fundit BDI ka rritje (Video)

Korridori 8 dhe 10D, kontradiktat që po përcjellin procedurat paraprake për këto projekte, ndryshimet kushtetuese, fraksionet e mundshme në BDI, kanë qenë temat rreth të cilave zv/kryeministri Artan Grubi me sukses është përballur në emisionin “Top Tema” udhëhequr nga gazetari i njohur Bobi Hristov.

Grubi ka njoftuar për përshpejtim të afateve për fillim të punimeve që ishin paraparë për 22 prill, duke theksuar se punimet solemnisht do të fillojnë më 4 prill, me një “solemnitet shtetëror” që do të mbahet te pikëpagesa ku fillon rruga me dy korsi Tetovë-Gostivar.

Duke folur për mundësinë që “Grupi i Zjarrit” të funksionojë si fraksion brenda BDI-së, ai tha se Statuti aktual partiak nuk parasheh fraksione, si dhe citoi fjalët e kryetarit të BDI-së Ali Ahmeti se kthim mbrapa nuk ka.

Grubi poashtu shtoi se “Grupi i Zjarrit” nuk ka dëmtuar BDI-në dhe se kjo parti ka shënuar rritje në anketën e fundit, transmeton Lideri.mk.

“Mendoj se në anketën e fundit jemi 8.2 për qind dhe vetëm BDI ka rejting më shumë se gjithë partitë tjera shqiptare”, theksoi Grubi pjesë që mund ta përcillni në videon më poshtë nga minuta 30.

Ai shtoi se po punojet qëllim që OBRM-PDUKM të votojë për ndryshimet kushtetuese. Nëse VMRO-DPMNE është e vendosur për Maqedoninë evropiane, atëherë do t’i bashkohet ndryshimeve kushtetuese, deklaroi sonte zv. kryeministri Artan Grubi.

Ai për “Top Tema” tha se sot Qeveria ka diskutuar për ndryshimet kushtetuese, por më parë kishin formuar një ekip që punon për këtë çështje.

“Për të mos qenë optimist, jam i bindur se do t’ia dalim, plani ynë është i shkëlqyer, shumë ambicioz dhe real për zbatim dhe realizim. E di që ka skeptikë, ju dëshironi që matematika e zhveshur dhe të numëron deputetët se si ta arrihet deri te 80, por ju e dini që gjithçka që kemi thënë deri më tani ka dalë kështu dhe është realizuar”, tha Grubi.

Grubi ka treguar se do të merren vesh në mënyrë të denjë, ashtu siç janë marrë vesh herën e kaluar me VMRO-DPMNE-në.

“Ne do të jemi kreativ, fleksibël dhe mendoj se do të gjendet një zgjidhje për këtë problem, por nuk mendoj se duhet të ketë metoda si shantazhi, nuk jam për këtë, por ne jemi liderë që duhet të marrim vendime të guximshme, janë të papëlqyeshme për ne, por për të mirën e vendit”, tha Grubi.

Sipas tij, për të gjitha vendimet e guximshme që kanë marrë, jemi shpërblyer si shoqëri.