Grenelli e quan të gabuar vendimin e Kurtit për të mos qenë pjesë e “Open Balkans”

Pas vizitës në Serbi, ish-i dërguari i presidentit Donald Trump për dialogun mes Kosovës dhe Serbisë, Richard Grenell, zgjodhi të vizitojë Shqipërinë.

Gjatë kësaj vizite ai dha një intervistë për “News24”, ku tregoi arsyen që e riktheu në Ballkan pasi la detyrën e lartë në administratën “Trump”.

Grenelli tha se po promovon investimet e huaja dhe bashkëpunimin ekonomik në rajon, si e vetmja mënyrë për të garantuar mirëqenie për të gjithë qytetarët, por veçanërisht për të siguruar më shumë mundësi punësimi për brezin e ri.

“Vizioni i presidentit Trump për dialogun mes Kosovës dhe Serbinë kishte të bënte me krijimin e vendeve të punës, me ekonominë, ideja ishte që rajoni i Ballkanit të ecte përpara. Ne kemi folur për politikën për dekada të tëra, por nuk kishte shumë progres kur ishim vetëm të ulur në tavolinë dhe diskutonim vetëm për politikë, kështu që ishte dëshira jonë që të përparonim, ta shtynim më tej, duke folur për zhvillimin ekonomik, duke folur për punësimin e rinisë, ja këtë kemi parë së fundmi, Marrëveshja për Normalizimin e Marrëdhënieve Ekonomike, që bëri të mundur administrata ‘Trump’, ishte shumë e frytshme. Por ajo që ne duam të shohim është vijimësia e atij investimi, ja prandaj jam këtu, nuk punoj më për qeverinë. Jam në sektorin privat dhe ne jemi duke parë mundësitë për të krijuar një sektor privat për investimet e huaja në Ballkan. Këtu jemi për të parë projekte të ndryshme, për të kuptuar më mirë cilin investitor duhet të sjellim për investimet e huaja”, tha Grenelli.

Si një diplomat që kishte nën mbikëqyrje ecurinë e bisedimeve Kosovë – Serbi, Grenelli komenton edhe vendimin e Kosovës për të qenë jashtë iniciativës “Open Ballkan”, siç është emërtuar “Mini-Shengeni Ballkanik”. Për të vendimi i Albin Kurtit është thjesht i gabuar.

“Unë mendoj se ai duhet të jetë pjesë e një bashkëbisedimi më të gjerë Ballkanik dhe ai nuk po e bën këtë. Është gabim i madh. Unë mendoj se Kosova njerëzit e Kosovës meritojnë të kenë vende pune, por pa qenë pjesë e këtij diskutimi ata nuk do të kenë mundësi të jenë pjesë e normalizimit të marrëdhënieve ekonomike në Ballkan dhe as të diskutimeve”, tha Grenelli.

Por vizionar e quan kryeministrin e Shqipërisë Edi Ramën, i cili thotë se ka treguar lidership në këtë iniciativë, që sipas tij do të krijojë më shumë vende pune për shqiptarët e për gjithë Ballkanin.

“Është jashtëzakonisht e rëndësishme të kemi këtë lidership, Rama e shikon qartësisht se zhvillimi ekonomik dhe refuzimin e asaj politike… Shiko, të rinjtë presin që të kenë vende pune, ata duan të shikojnë që industri të reja po vijnë në vendin e tyre dhe unë mendoj se vizioni që ka kryeministri Edi Rama është një vizion shumë i mirë për njerëzit, kjo do të thotë një jetë më e mirë për shumë shqiptarë dhe sigurisht në mbarë Ballkanin”, tha Grenelli.

I pyetur nga “News24” për vendimin e DASH-it për ish-kryeministrin Sali Berisha, ose edhe për deklaratën e këtij të fundit për ndikimin e Geoge Soros ose të kryeministrit Rama te Departamenti i Shtetit, Grenelli u rezervua në komente.

“Shiko, këto janë vendime të administratës së tanishme dhe nuk do t’i komentoj”, tha ai. /Zëri