ASHAM del me reagim: Në Maqedoni ka vetëm një akademi kombëtare
Akademia e Shkencës dhe Arteve të Maqedonisë (ASHAM) ka dalë me reagim pas paralajmërimeve nga zyrtarët e VLEN-it se do të themelojnë Akademinë Shqiptare në RMV. Nga ASHAM thonë se nuk do të futen në diskutimet politike dhe partiake, duke shtuar se në RMV ekziston vetëm një akademi.
“ASHAM është institucioni më i rëndësishëm kombëtar shkencor e artistik me interes të veçantë shoqëror në vendin tonë, i krijuar në vitin 1967, në përputhje me standardet dhe kriteret më të larta universale shkencore e artistike. Për disa dekada me veprimtarinë e saj kërkimore-shkencore, me krijimtarinë dhe me rolin e saj këshillues, ajo paraqet shtyllë në ndërtimin dhe ruajtjen e identitetit dhe shtetësisë së popullit maqedonas dhe pjesëve të popujve të tjerë që jetojnë në vend”.
“Theksojmë se në Maqedoni, si dhe në vendet e rajonit dhe në botë, ekziston vetëm një akademi kombëtare që përfaqëson vendin në asociacionet evropiane dhe akademi tjera ndërkombëtare. Ka shembuj në vendet e rajonit dhe më gjerë për formimin e të ashtuquajturave akademitë profesionale në kuadër të shoqatave përkatëse profesionale (Akademia e Arkitekturës, Akademia e Shkencave Mjekësore etj.), si dhe shoqëri të tjera shkencore dhe artistike në qytetet më të mëdha dhe në qendrat rajonale, por nuk ka shembuj të krijimit të akademive kombëtare paralele. ASHAM ka qenë gjithmonë e hapur për të gjithë qytetarët që plotësojnë kriteret e larta shkencore dhe artistike për anëtarësim, pavarësisht nga përkatësia etnike, fetare apo çfarëdo përkatësie tjetër”.
“Partitë politike dhe ndikimet e tyre nuk kanë pasur kurrë vend në të. Nga themelimi i saj e deri më sot, anëtarë të Akademisë kanë qenë pjesëtarë të popullit maqedonas, por edhe të të gjitha bashkësive etnike. Ndër të tjera, në pesëmbëdhjetë vitet e fundit, përbërja e ASHAM përbëhej nga katër anëtarë të përkatësisë etnike shqiptare (prej të cilëve, në tre kryesitë e njëpasnjëshme, njëri prej tyre mbante postin e sekretarit shkencor dhe dy ishin nënkryetarë të Akademisë, njëri prej tyre me mandat në drejtimin aktual të Akademisë), si dhe katër anëtarë jashtë përbërjes së punës”.
“Kryesia bën me dije se ASHAM asnjëherë nuk është marrë dhe nuk do të merret me debate politike ditore dhe diskutime partiake, të cilat rëndojnë veprimtarinë e rregullt të Akademisë, gjegjësisht me çështje që i përkasin domenit të Legjislativit dhe institucioneve shtetërore”, thuhet në reagimin e ASHAM-it.
