Arrestohet 32-vjeçari në Shkup, rrahu të dashurën në veturë taksie

Prokuroria Themelore Publike Shkup ka iniciuar procedurë kundër një 32-vjeçari nga Shkupi për shkak të dyshimit për kryerjen e veprës penale – Lëndim i rëndë trupor nga neni 131 paragrafi 2 në lidhje me paragrafin 1 të Kodit Penal. Më 14 tetor, i dyshuari me paramendim ka lënduar rëndë partneren e tij jashtëmartesore duke ushtruar dhunë në familje.

“Të dy po ktheheshin në shtëpinë e tyre me një taksi kur mes tyre filloi një debat verbal. Në momentin kur kanë ardhur afër shtëpisë, i dyshuari e ka kapur viktimën për flokësh, e ka nxjerrë nga taksia dhe e ka goditur me kokë në ballë, duke i çarë arkadën e majtë. Më pas ka vazhduar ta godasë në hundë, nofull, stomak dhe shpinë, duke i shkaktuar lëndime të rënda trupore – fraktura dhe gjakderdhje”, thonë nga Prokuroria.

Sipas vlerësimit të prokurorit publik, në ngjarjen konkrete penalo-juridike janë plotësuar supozimet ligjore për caktimin e masës së paraburgimit – rreziku i arratisjes dhe mundësia e përsëritjes së dhunës në familje ndaj të dëmtuarës. Për këto arsye, prokuroria ka dorëzuar propozim për caktimin e masës së paraburgimit te gjyqtari i procedurës paraprake nga Gjykata Themelore Penale Shkup.