Shkup, polici e ka lënë qenin zyrtar në veturë, ka ngordhur nga i nxehti

Departamenti për Kontroll të Brendshëm, Hetime Penale dhe Standarde Profesionale në MPB ka bërë kallëzim penal kundër D. M., punonjës policie në pozitën udhërrëfyes i qenve të shërbimit, për shkak të ekzistimit të shkaqeve të dyshimit se ka kryer veprën e “vrasjes dhe torturimit të kafshëve”, sipas nenit 233 të Kodit Penal.

Më datë 12.06.2024, nga ora 10:00 deri në ora 12:30 në zonën e Qendrës në Shkup, pas kryerjes së detyrave të punës, e ka vendosur qenin e shërbimit në pjesën e pasme të veturës zyrtare “Dacia”. Qeni ka qenë racë “bari belg”, kurse policia ka parkuar automjetin me motor dhe kondicioner të fikur dhe ventilim të ndezur dhe ka lënë mjetin të parkuar për një orë e gjysmë, raporton portali Lideri.mk. Pas kthimit, ai ka vërejtur se qeni ishte në gjendje të keqe shëndetësore dhe e ka dërguar në stacionin veterinar ku është konstatuar se qeni tashmë kishte ngordhur. Pas autopsisë së kryer nga Fakulteti i Mjekësisë Veterinare, u konstatua se shkak i ngordhjes së qenit ishte mbytja e shkaktuar nga goditjet nga nxehtësia, njoftoi MPB.

Siç raporton lideri.mk, Departamenti i Kontrollit të Brendshëm, Hetimeve Penale dhe Standardeve Profesionale në përputhje me kompetencat e tij ndaj punonjësit të policisë D.M. do të paraqesë propozim për fillimin e procedurës për përcaktimin e përgjegjësisë disiplinore dhe materiale./Lideri