Ndërmarrja publike “Ujësjellës dhe Kanalizim – Shkup” u bën thirrje qytetarëve të Shkupit që ta përdorin ujin në mënyrë racionale dhe të kujdesshme.
“Në veçanti, shmangni humbjet e panevojshme të ujit për ujitje të kopshteve dhe fushave, mbushjen e pishinave, etj. gjë që shkakton paqëndrueshmëri në furnizimin me ujë në zonat e larta të qytetit, si në Pripor dhe Sopishte, ku gjatë ditëve të fundit vërehet një konsum i madh i ujit, i cili nëse nuk racionalizohet mund të sjellë ndërprerje në furnizim të ujit”, theksohet në një njoftim të ndërmarrjes.
Bazuar në të dhënat e ndërmarrjes, harxhimi ditor arrin mbi 340.000 metra kub ujë, që është 30% rritje në krahasim me periudhën dimërore. “U bëjmë thirrje qytetarëve të Shkupit që ta përdorin ujin për pije dhe ta shmangin ujitjen e sipërfaqeve të mëdha, freskimin e sipërfaqeve të oborrit, rrugëve dhe shpenzimin e panevojshëm të ujit gjatë ditëve të nxehta”, theksohet në njoftimin e Ndërmarrjes Publike “Ujësjellës dhe Kanalizim – Shkup”.
